तातोपानी नाका जेठ १७ गते चालीगु, स्थानीयवासीया ख्वालय् उत्साह

तातोपानी – गोरखाय् केन्द्रविन्दू जुयाः ब्वःगु तःभुखाय् लिपा खण्डहर थें जूगु तातोपानी नाकाय् हाकनं चहपह सुरु जूगु दु । दुनाच्वंगु छेँ भवनय् दयेकाः रंगरोगन यायेगु सुरु जुयावःगु दु, मनूत जूगु तकं मदयेधुंकूगु अरनिको राजमार्गं नं न्हूगु जीवन चूलाकूगु दु । नेपाः व चीन स्वाइगु मितेरी ताँ ढलान यायेगु निंतिं चिनियाँ ज्यामित चान्हि मधासे ज्या यानाच्वंगु दु ।

वंगु फागुन निगूगु वाःनिसें दयेकेगु सुरु जूगु ताँ स्वलाया दुने दयेके क्वचायेत्यंगु दु । सम्भवतः थ्व हे जेठ १७ गते तःभुखाय् ब्वयेधुंकाः बन्द जूगु तातोपानी नाका हाकनं संचालनय् वइगु जुइ । वंगु छुं न्हि दुने जूगु ज्या स्वयेबलय् प्यदँ न्ह्यव बन्द हे जुयावनेधुंकूगु तातोपानी नाका हाकनं न्हूगु स्वरुपय् स्थापित जुइत्यंगु दु ।

भुखाय् लिपा वःगु चलखं क्षतिग्रस्त जूगु लिपिङ व तातोपानी क्षेत्रया सतक पुनःनिर्माण जुइधुंकूगु दु । दुने हे धुंकूगु छुं छेँ बाहेक मेगु संरचना ल्ह्वनेज्या यानाः आः तयारी अवस्था दु । होटल, गेस्टहाउसय् नं न्हूपिं मनूत खनेदया वयाच्वंगु दु । थप छु छुं थाय् सतक पुनःनिर्माणया ज्या जुयाच्वंगु दु ।

नाका चालेत्यंगु दु धयागु न्यनेवं स्थानीयवासी तसकं लय्तायाच्वंगु दु । उमिगु ख्वालय् खनेदुगु उत्साह स्वयेबलय् न्ह्यइपुगु खनेदु ।
वर्षौं तक नाका मचालेवं पलायन जूपिं नं लिहां वयाच्वंगु दु । नेपाल सरकारं तःक्वःगु इनाप यायेधुंकाः चीन थ्व रणनीतिक महत्वया नाका चायेकेत तयार जूगु खः ।

नाका चालीगु न्हापांगु न्हि कुन्हु सांकेतिक रुपं तिब्बतया खासां ऊन ज्वनावइगु खुगः ट्रक नेपाः दुहां वइगु जुइ । थ्व ट्रकयात नेपाली व्यवसायीतय्सं लसकुस याइगु जुइ । मितेरी ताँ लिक्कसं भन्सार व अध्यागमन कार्यालय चायेकेधुंकूगु दु । छुं ई लिपा थ्व ज्याकू तातोपानी नाका लिक्कसं दयेकूगु सुक्खा बन्दरगाहय् सरे जुइ ।

सीमा सुरक्षाया निंतिं नेपाली प्रहरी, सशस्त्र प्रहरी तैनाथ जुइधुंकूगु दु । प्यदँ न्ह्यवनिसें नाकाया भन्सार ज्याकू पियाच्वंम्ह साँइला धाइम्ह तिलकबहादुर मगर मेपिं स्वयां तसकं लय्ताः । वय्कलं धयादी, ‘भुखाय् धुंकाः तातोपानी बजारय् मनूत धयागु हे खनेमदुगु । तसकं कष्ट जूगु खः । बुलुहुं घालय् मल्हम तयेगु ज्या जुल ।

आः हाकनं नाका चालेत्यंगु दु ।’भोटेकोशी गाउँपालिका २या वडाअध्यक्ष दीपेन्द्र श्रेष्ठ नाका बन्द जुइवं स्थानीयवासीं तसकं सास्ती फयेमाःगु लुमंकादी । ‘व्यस्त बजाः आकाझाकां खण्डहर जुइबलय् सुयाः नुगः क्वमतूनि । जिमिगु नं अथेहे जुल । हजारौंया रोजगारी तन, देशं तःधंगु राजश्व त्वःफिके माल ।

व्यापार व्यवसाय चौपट जुल’ वय्कलं धयादिल, ‘तातोपानीयात सुरक्षित व मर्यादित यायेत जनप्रतिनिधिया हैसियतं छुछु यायेमाः जि यायेत तयार दु ।’ नाका बन्द जुइवं थनया यक्व व्यवसायी पलायन जुल । न्हियान्हिथं चले जुइगु द्वःछिगलं मल्याक कन्टेनर मेथाय् वनेत बाध्य जुल । होटल व्यवसाय चौपट जुइ ।

आः सीमा क्षेत्रय् नेपाः व चीनया स्वापुतिइ आघात लाइगु छुं नं कथंया गतिविध पूवंक नियन्त्रण यायेगु योजनाय् भोटेकोशी गाउँपालिका लगे जुयाच्वंगु दु । गाउँपालिकाया प्रमुख राजकुमार पौडेलं धयादिल, ‘जिमिसं स्थानीयवासीयात नियमित रुपं प्रशिक्षत यानाच्वनागु दु । ताःहाकःगु कुतः लिपा चालेत्यंगु नाकायात थप व्यवस्थित, सुरक्षित व मर्यादित यायेमाः ।

जःलाखःला देय् विरुद्ध जुइगु छुं नं गतिविधि झीगु निंतिं मान्य जुइमखु ।’गाउँपालिकां हे सीमा क्षेत्रय् अरनिकोया मूर्ति सहित आकर्षक गेट दयेकेत विस्तृत परियोजना प्रतिवेदन (डिपीआर) दयेकेगु तयारी सुरु याःगु दु । भुखाचं सुनसान जूगु तातोपानी म्वःल्हूवनीपिनि ल्याः नं अप्वया वःगु दु ।

नाका संचालन जुइगु खबर वयेवं स्थानीय छिरिङ शेर्पां धयादिल, ‘जिमिसं ला न्हूगु जीवन चूलाकागु थें जुल ।’दुनावःगु छेँ व संरचना मर्मत सम्भार यासें स्थानीयवासी नाका चालीगु खबरं उत्साहित जक जूगु मदु, आर्थिक रुपं बल्लाइगु खँय् नं आशावादी जुयाच्वंगु दु । मेम्ह छम्ह स्थानीयवासी मिङ्मा शेर्पां धयादिल, ‘नेपाल सरकारया तःधंगु कुतः लिपा नाका संचालनय् वयेत्यंगु जिमिगु निंतिं तसकं लसता व उत्साहया खँ खः ।’

नाका चायेकेत यानागु कुतःयात लुमंकुसें नेपाल कम्युनिष्ट पार्टी (नेकपा) स्थायी समितिया दुजः व सिन्धुपाल्चोकपाखें सांसद जुयादीम्ह अग्नि सापकोटां धयादिल, ‘तःधंगु कुतः लिपा सार्थकता चूलायेत्यंगु दु । याःसा छु मजुइ धयागु खँ स्थापित जुइत्यंगु दु ।’ भुखाय् ब्वयेवं बन्द जूगु नाका चायेकेत प्यदँया दुने तःक्वः हे तत्कालिन निसें वर्तमान प्रधानमन्त्री, पार्टीया शीर्ष नेता, चिनियाँ दूतावास व कुटनीतिकयात नापलानाः यानागु कुतःयात वय्कलं लुमंकादिल ।

नाका चायेकेगु निंतिं कुतः याःपिं मध्ये छम्ह खः विष्णु श्रेष्ठ । श्रेष्ठं धयादिल, ‘सरकार हे लगे जुयाः नाका चयोकूगु खः ।’सीमा प्रहरी चौकीया प्रहरी निरीक्षक हिरासिंह महरां शान्ति सुरक्षाया विषयय् छुं सम्झौता मजुइगु खँ कनादिल । तातोपानी भन्सार कार्यालयया भन्सार अधिकृत कृष्ण बस्नेतं नाका संचालनया निंतिं आवश्यक फुक्कं तयारी पूवनेधुंकूगु खँ कनादिल ।

‘छुं प्राविधिक ज्या जुयाच्वंगु दु । ज्याकू तयारी अवस्थाय् दु । कर्मचारीया व्यवस्थापन नं जुइधुंकूगु दु’ वय्कलं जानकारी बियादिल ।गृह मन्त्रालय मातहतया अध्यागमन विभागं नं अध्यागमन कार्यालय चायेकेधुंकूगु दु ।

अध्यागमन विभागया महानिर्देशक ईश्वरराज पौडेलं धयादिल, ‘ताःई लिपा चायेत्यंगुलिं नाकायात व्यवस्थित यायेत छुं ई ला लगे जुइ, तर तत्कालया निंतिं आवश्यक व्यवस्थापन यायेधुनागु दु । गृहमन्त्री रामबहादुर थापां जःलाखःला देय्या चासोयात समेत सम्बोधन जुइकथं शान्ति सुरक्षाया फुक्कं प्रबन्ध यानागु व छुं नं कमजोरी मजुइक गृह मन्त्रालयं तसकं सचेत दुगु खँ कनादिल ।

सम्बन्धित बुखँ

LEAVE YOUR COMMENTS