खोनाय् लुया वल पुरातात्विक ज्वलं
- नेपालभाषा टाइम्स
- किपा-किपा साभार - सुरज महर्जन
फास्ट ट्राय्कया लँपु हिलेगु आन्दोलनयात तिबः
येँ – खोनाय् फास्ट ट्राय्क दयेकाच्वंगु थासय् उत्खनन् याःबलय् आपालं पुरातात्विक वस्तुत लुया वःगु दु । खोनाया प्राचीन कुदेशय् उत्खनन् यायेगु झ्वलय् पुलांगु तुं, द्यःया मूर्ति, अप्पां सियातःगु लँ, छेँया जग, ल्वहँतय् दयेकातःगु थीथी सामान लिसें दरवारया अवशेष, नीलः बीगु थल आदि लूगु खँ सेभ नेपाल भ्याली अभियानया संयोजक असोज महर्जनं ‘नेपालभाषा टाइम्स’ यात कनादिल ।
थःपिंसं न्हापांनिसें उगु लागा पुरातात्विक लागा जूगुलिं अनं फास्ट ट्राय्क दयेके मजिउ धया वयाच्वनागु खँ कनादिसें वय्कलं सरकारं पुरातात्विक क्षेत्रयात नष्ट यायेगु कथं सम्पदा क्षेत्रय् फास्ट ट्राय्क दयेकेत्यंगु द्वपं बियादिल ।
उगु लागाया सुरक्षा यानाः उत्खनन् यायेगु लागिं स्थानीय जनतां ताः ई न्ह्यवंनिसें पुरातत्व विभागयात इनाप याना वयाच्वंगु खःसां विभागं धाःसा उकियात वेवास्ता यानाच्वंगु खः । थनिं लछि न्ह्यवंनिसें इतिहासविद् छत्रबहादुर कायस्थया ग्वाहालिं अन उत्खनन् याःगु खःसा वहे झ्वलय् थ्व ज्वलंत लुया वःगु खः ।
आः थ्व ज्वलं इतिहासविद्तय्त क्यनाः उकिया बारे जानकारी कायेगु तयारी जुयाच्वंगु दु । उत्खनन्या झ्वलय् अन झिंस्वसःदँ पुलांगु सिंहया मूर्ति लूगु दावी जुयाच्वंगु दु । अन लुया वःगु सामग्रीयात न्ह्यःने तयाः थौं हे पुरातत्व विभागय् थप उत्खनन् यायेगु लागिं निवेदन तयेत्यनागु जानकारी संयोजक महर्जनं बियादिल ।
वय्कलं कनादी कथं मोहनि नखः न्ह्यः पुरातत्व विभागं वहे थासय् उत्खनन् यानाः अन पुरातात्विक व ऐतिहासिक छुं सामग्री मलू धकाः सेनायात प्रतिवेदन बिउगु खः । उत्खनन् यायेगु ज्या सेभ नेपाल भ्याली अभियान व स्थानीय जग्गाथुवाः जानाः याःगु खः । उगु थाय् न्हापा स्वनिगलय् दुहां वःपिं च्वनीगु थाय् जूगु दावी जुयाच्वंगु दु ।
उगु थाय् न्या लालां दुहां वःपिनिगु न्हापांगु वस्ती जुइमाः धाःगु दु । सरकारं फास्ट ट्राय्क दयेकेगु झ्वलय् खोनाया पुरातात्विक व ऐतिहासिक सम्पदाय् लिच्वः लाकेगु जुइ मखु धायेगु यानाच्वंगु खँ कनादिसें आः ऐतिहासिक व पुरातात्विक वस्तु लुइधुंकाः ट्राय्कया अलाइटमेन्ट हिलेमाःगु माग नं खोनाया वासिन्दां याःगु दु ।
LEAVE YOUR COMMENTS