षडयन्त्रया आशंका
बलिउडया चर्चित अभिनेत्री श्रीदेवी कपुर सीगु यक्व दयेधुंकल । तर वयागु रहस्यमय मृत्युयात कयाः अनेकथंया शंका उपशंका धाःसा आतक नं जुयाच्वंगु दु । खतुं श्रीदेवी मदुगु समाचारं वया प्रशंसकत जक मखु, विश्वयात अजू चायेका बिउगु खः ।
श्रीदेवीया आकाझाकां जूगु मृत्युयायात कयाः अनेकथंया शंका उपशंकाः बलिउड फिल्मी बजाः जक मखु संचार माध्यमय् नं यक्व हे चर्चा व बहस जुल । श्रीदेवीया मृत्यु लिपा शोकय् दुनाच्वंपिं वया छेँजःपिं बुलुहुं शोकं पिहां वयेगु शुरु जुयाच्वंगु हे इलय् लाक्क हाकनं वयागु मृत्युयात कयाः मेगु चर्चा शुरु जूगु दु ।
बाथटबय् दुनाः श्रीदेवीया मृत्यु जूगु धइगु समाचार वयेवं वयागु मृत्युयात कयाः जुयाच्वंगु शंका उपशंका नं छगूकथं बन्द हे जूगु खः । तर थ्व दथुइ लिपांगु इलय् वयाः भारतया छम्ह पुलांम्ह प्रहरी अधिकारीं बाथटबय् दुबे जुयाः श्रीदेवीया मृत्यु जूगु खःसां उकिया लिउने छगूकथं सीकं चायेकं षडयन्त्र जूगु दयेमाः धकाः धाःगु दु । उम्ह प्रहरी अधिकारीं धाःगु दु, ‘थ्व दुर्घटना मखसे हत्याया मामिला खयेमाः ।’
वेदभूषण नांया पुलांम्ह प्रहरी अधिकारीं थःत श्रीदेवीया क्वथाय् वनेगु अनुमति मबिल, तर लिक्कच्वंगु मेगु क्वथाय् वनाः श्रीदेवीया मृत्युया दृश्ययात ‘इनएक्ट’ यानाः स्वःगु खः ।
थ्व हे झ्वलय् भारतया सर्वोच्च अदालतं फिल्म निर्माता सुनील सिंहया छगू निवेदनयात खारेज याना बिउगु दु । गुकी श्रीदेवीया रहस्यमय मृत्युयात कयाः हाकनं जाँच यायेत अपिल यानातःगु खः ।
LEAVE YOUR COMMENTS