रणवीरया भूमिकाय् ऋषि भावुक

बलिउडय् थौंकन्हय् बायोपिक फिल्म निर्माण यायेगु क्रम अप्वयाच्वंगु दु । थ्व झ्वलय् बलिउडया छम्ह चर्चित नायक सन्जु अर्थात संजय दत्तयात कयाः बायोपिक फिल्म निर्माण जुइत्यंगु दु ।

संजय दत्तया बायोपिकय् दयेकेत्यंगु फिल्म ‘सन्जु’ थगु दँया हे दकलय् तःधंगु व सफल फिल्म जुइगु अनुमान यायेगु ज्या धाःसां आवंनिसें हे शुरु जुइधुंकूगु दु । उकिया कारण खः संकिपाया ‘टिजर’ ।

सन्जुया टिजर आः नकतिनि प्रदर्शन याःगु खः, गुकियात कयाः आपालं स्वकुमिपिंसं तारिफ मयासें च्वने मफुत । अले प्रतिक्रिया नं बांलाःगु हे प्राप्त जुइवं फिल्म निर्माण न्ह्यः हे सफल फिल्मया दर्जा कायेत ताःलाःगु दु ।

संजय दत्तया बायोपिकय् वयागु हुबहु अभिनय स्वये खनीगु थुगु संकिपाय् रणवीर कपुरया अभिनययात सकसिनं हे तारिफ याःगु दु । टिजर स्वःपिं सकसिनं हे रणवीरया भूमिका व वयागु अभिनययात कयाः तारिफ याःगु दुसा रणवीरया अबु ऋषि कपुर तसकं प्रभावित जूगु दु । थुलि तक कि थः कायया अभिनय खनाः ऋषि कपुर भावुक जक जूगु मखसे मिखा लसताया ख्वबि तकं हाल ।