हिसान शिक्षा मेला वइगु बिहिवाः निसें

येँ – उच्च शिक्षा तथा माध्यमिक विद्यालय संघ नेपाल (हिसानं) खुक्वःगु शिक्षा मेला यायगु जूगु दु । वइगु बिहिवाः निसें सुरु जुइगु मेलाय् नेपालय् संचालित स्कूलतय्सं बिया वयाच्वंगु गुणस्तरीय व उत्कृष्ट शिक्षा बारे जानकारी बिइगु खँ हिसानया नायः रमेश सिलवालं धयादीगु दु ।

वय्कलं उच्चशिक्षाया निंतिंविदेशय् वनाच्वंपिं विद्यार्थीतय्त नेपालय् हे गुणस्तरीय शिक्षा चूलाकेफइ धयागु सन्देश बीत नं मेलाया ग्वसाः ग्वयागु खँ धयादिल ।वय्कःया कथं दँय् छगू लाख १२ हजार विद्यार्थी विदेशय् अध्ययन यायेत पिहांवनाच्वंगु दु । थथे विदेश ब्वंवनेगु निंतिं जक नेपाःया पाखें दँय् अर्बौं अर्ब तका पिहांवनाच्वंगु दु ।

मेलाय् माध्यमिक विद्यालयनिसें विश्वविद्यालयस्तया उच्च शिक्षाया बारे जानकारी बीगु १५० गुलिं मल्याक शैक्षिक संस्थाया स्टल दइगु खँ धाःगु दु । भृकुटीमण्डपय् जुइगु थ्व मेला प्यन्हु तक न्ह्याइ ।