महानगर सिरपालं नेवाः मिडिया बञ्चित

येँ (नेपालभाषा टाइम्स)- दँय्दसं महानगर दिवस कुन्हु बीगु सुशासन पत्रकारिता पुरस्कारपाखें थुगुसी नेवाः मिडिया बञ्चित जूगु दु । न्हापा झिम्हेसित बीगु थ्व सिरपाः थुगुसी न्याम्हेसित जक बिउगु दुसा सिरपाः लाःपिं न्याम्हं खस नेपाली भाय्या मिडियाकर्मीत खः । न्हापा थ्व सिरपाः झिम्ह सञ्चारकर्मीयात बीगु याना वयाच्वंगु खःसा उकी मध्ये स्वम्ह अनिवार्य रुपं नेवाः मिडियायापिं जुइमाःगु व्यवस्था यानातःगु खः ।

थुगुसी थ्व सिरपाः श्रीजन झा, रत्नकाजी महर्जन, प्रल्हाद रिजाल, भउचप्रसाद यादव रीना मोक्तानयात बिउगु खः । वय्कःपिं न्याम्हं खस नेपाली भाय्या सञ्चारकर्मीत खः ।

येँ महानगरपालिकां येँया हे स्थानीय भाषा नेपालभाषाया माध्यमं पत्रकारिता याइपिंत सिरपालं बञ्चित याःगु खँय् नेवाः पत्रकार ख्यः क्षुब्ध जूगु दुसा थुकियात नेवाः भाय् प्रति याःगु भेदभाव धाःगु दु ।