आयकर दरय् हिउपाः मवइगु

येँ – वइगु आर्थिक दँ २०७६÷७७ य् व्यवसायीतय् आयकर ५ प्रतिशत म्हो यायेगु माग सम्बोधन मजुइगु जूगु दु । चालु आर्थिक दँय् लक्ष्य कथं राजश्व म्हये मफयेवं दबाब लानाच्वंम्ह अर्थमन्त्री डा. युवराज खतिवडां वइगु आर्थिक दँय् नं आयकरय् विद्यमान व्यवस्थायात हे तइगु जूगु दु ।

आयकर अप्वयेकेगु सम्भावना मदुगु व म्हो यायेबलय् नं राजश्व लक्ष्य कथं म्हयेमफइगु जुइवं अर्थमन्त्री खतिवडां वइगु आर्थिक दँय् नं चालु आर्थिक दँया व्यवस्थाकथं हे वनेगु तयारी याःगु खः । चालु आर्थिक दँय् आयकरया स्ल्याब व दरय् हिउपाः हयाः थ्यंमथ्यं ४०प्रतिशत वृद्धिया लक्ष्य तयातःगु खःसां उगु लक्ष्य धाःसा पूमवनीगु खनेदयेधुंकूगु दु ।

उकिं व्यवसायीतय् दबाब दुसां अर्थमन्त्री आयकर म्हो यायेत तयार मदु । उकिसनं वइगु दँय् अझ अप्वः राजश्व म्हयेमाःगु दबाब लाइगुलिं नं व्यक्तिगत व संस्थागत निखेरंया आयकर व्यवस्था यथावत हे तयेत्यंगु खँ अर्थमन्त्रालयं स्रोतं धाःगु दु । अर्थ मन्त्रालयं आः राजश्व दर अप्वयेकेगु स्वयां नं राजश्व म्हयेगु प्रणालीइ हे सुधार हयेगु मान्यता कथं बजेट दयेकाच्वंगु खँ धाःगु दु ।

चालु आर्थिक दँय् लक्ष्य कथं राजश्व म्हये मफयेवं वइगु आर्थिक दँय् नं आयकरय् विद्यमान व्यवस्था कथं हे यायेगु अर्थमन्त्री
युवराज खतिवडाया तयारी

अर्थ मन्त्रालयया छम्ह अधिकारीं आः प्रणालीगत सुधार व सहज रुपं कर पुलेफइगु वातावरण दयेकेगु निंतिं ज्या जुइगु धासें कर दरय् धाःसा छुं हिउपाः मवइगु खँ धयादीगु दु । व्यवसायीतय्सं धाःसा प्रतिस्पर्धात्मक व्यावसायिक वातावरणया निंतिं निजी ख्यःपाखेया संस्थागत आयकर दर म्हो यायेमाःगु माग याना वयाच्वंगु खः ।

थौंकन्हय् संस्थागत आयरकया दर गुगुं क्षेत्रय् ३० प्रतिशत दुसा गुगुं क्षेत्रय् २५ प्रतिशत दु । व्यवसायीतय्सं धाःसा वंगु शुक्रवाः अर्थमन्त्रीयात नापलासें ५ प्रतिशत आयकर म्हो यायेत माग याःगु खः । थौंकन्हय् व्यक्तिगत आयकरय् ब्याहा मयाःनिपिनिगु निंतिं न्यूनतम सीमा ३ लाख ५० हजार व ब्याहा यायेधुंकूपिनि निंतिं ४ लाख तयातःगु दु । व्यक्तिगत पाखे नं कर दर म्हो यायेमाःगु सः धाःसा थ्वयाच्वंगु दु ।

सम्बन्धित बुखँ

LEAVE YOUR COMMENTS