‘ढुवानी शुल्क अप्वयेवं मोबाइल व ल्यापटपया भाः थहां वन’
येँ (नेपालभाषा टाइम्स) – कोरोना भाइरसया कारणं लकडाउन जुयाः ताः ई निसें सामान आयात मजुइवं बजारय् ल्यापटप व मोबाइल अभाव जुयाच्वंगु खँ व्यापारीतय्सं धाःगु दु। छखे सामान आयात मजुयाच्वंगु दुसा मेखे ढुवानी शुल्क नं अप्वया वनेवं व्यापारीतय्सं थिकेगु भावं सामान मी मालाच्वंगु व्यापारीतय् धापू दु। व्यापारीतय् कथं लकडाउन जुइ न्ह्यः तक सूचना प्रविधिया सामानय् प्रतिकिलो २ डलर शुल्क पूसा गाःगुलि आः वयाः १२ डलर तक पुलेमालाच्वंगु दु ।
सामान आयात यायेत विमान चार्टर्ड यायेमाःगुलिं भाः थहां वंगु खँ नं व्यापारीतय्सं धाःगु दु। ढुवानी खर्च थिके जूगु कारणं यानाः हे थौंकन्हय् बजारय् कम्प्युटरया लिसें मोबाइलया अभाव जुयाच्वंगु खँ न्हू सतकया मोबाइल व्यापारी राम खड्गी ‘नेपालभाषा टाइम्स’ यात कनादीगु दु। वय्कलं धयादी, ‘बजारय् मोबाइल व ल्यापटप न्यायेगु मदु, अथे जुयाः भाः थहां वंगु खःसा मेता कारण धइगु प्लेन चार्टर्ड यानाः सामान हयेमाः, प्लेन चार्टर्ड यायेबलय् अप्वः ध्यबा पुलेमालिगु स्वाभाविक खः ।’
तर गुलिखें व्यापारीतय्सं धाःसा थःपिंके स्टकय् लानाच्वंगु सामान आः वयाः थिकेक मियाच्वंगु नं दु। व्यापारीतय् कथं बजारय् सामानया अभाव जुइवं भाः थकयाः मीगु चलन नं अप्वया वनाच्वंगु दु। थौंकन्हय् देय्न्यंकंया विद्यालयं अनलाइन कक्षा सञ्चालन यायेवं मोबाइल व ल्यापटपया माग अप्वया वनाच्वंगु दु। न्हापा थःपिंके दुगु मोबाइलय् अनलाइन कक्षाया निंतिं पाय्छि मजुइवं न्हूगु मोबाइल न्याइपिं ग्राहक अप्वयाः वनाच्वंगु दु, तर बजारय् माक्वः मोबाइलया आपूर्ति मजुइवं व्यापारीतय्सं थःपिंके दुगु मोबाइल नं अप्वः भाः कयाः मियाच्वंगु खँ व्यापारीतय्सं धाःगु दु ।
नां कने मयःम्ह छम्ह व्यापारीं धयादी, ‘फुक्कं मोबाइलय् अनलाइन कक्षा सञ्चालन यायेगु निंतिं उपयुक्त जुइ मखु, अथे जुयाः न्हूगु भर्सन दुगु मोबाइल न्यायेत अभिभावकपिं बाध्य जुयाच्वंगु दु। तर बजारय् न्हूगु भर्सनाया मोबाइल धाःसा म्हो जक दु, अथे जुयाः अभिभावकपिंसं अप्वः ध्यबा पुलाः जूसां मस्तय्गु निंतिं न्हूगु मोबाइल न्यायेगु यानाच्वंगु दु ।’
व्यवसायीतय् कथं थौकन्हय् मोबाइल व ल्यापटपया कारोबार २५ प्रतिशत अप्वया वनाच्वंगु दुसा सुचनां प्रविधिया कारोबार अप्वया वनेवं पुलांगु मोबाइल त्वःताः न्हूगु मोबाइल न्याइपिनिगु ल्याः नं अप्वयाः वनाच्वंगु दु ।
LEAVE YOUR COMMENTS