त्रिपुरेश्वर–कलंकी विस्तारया डीपीआर हे त्रुटि

येँ – त्रिपुरेश्वर–कलंकी–नागढुंगा सतक विस्तारया डीपीआरय् हे त्रृटि लूगु दु । आयोजना न्ह्याःगु इलंनिसें हे गम्भीर लापरवाही जूगु नं अध्ययनं सीदुगु दु । सार्वजनिक खरिद अनुगमन ज्याकुथिं याःगु अध्ययनं उगु सतक खण्डय् सरकारी व ठेकेदारपाखें जूगु गल्ती कमजोरी पिने हःगु दु । थ्व लँ २२.४८ किलोमिटर दु ।

थुकिया डीपीआरय् ‘साइट क्लेरेन्स’ या निंतिं ग्वःखा छेँ थुनेमाःगु धइगु खँ तकं दुमथ्याः । सतक जःखः आपालं छेँ दनातयेधुंकूगु दु । अथेहे लः, धः, मत, टेलिफोन थेंज्याःगु मेगु पूर्वाधारया व्यवस्थापनया निंतिं तुइगु खर्च तकं डीपीआरय् न्ह्यथनातःगु मदु ।

सार्वजनिक खरिद अनुगमन कार्यालयया कथं डीपीआरय् अज्याःगु छुं नं खँ न्ह्यथनाः मतःगुलिं वास्तविक अवस्थाया जानकारी कायेत व वास्ताविक लागत अनुमान व निर्माणया ज्या न्ह्याकेत तकं समस्या जूगु दु । आयोजनायात छाय् न्यागू प्याकेजय् ब्वथलाः ठेक्का बीमाःगु खः धइगु खँ नं डीपीआरय् स्पष्ट मदु । उकथं हे सतकया साइट क्लेरेन्सया निंतिं छु छु सरकारी निकायं छु छु ज्या यायेमाः धइगु बारे नं न्ह्यथनातःगु मदु ।