प्यंगः शिवालयया पुनःनिर्माण अलपत्रय्

बागमति खुसिया सिथय् प्यंगः शिवालय (महाःद्यःया देगः) झ्वःलिक दु । छगः देगः धाःसा धेचुयाः क्वःदलेत्यंगु दु । मेगु छगः देगः थाय्थासय् चिरि बायाच्वंगु दु । देगःया लुखा फुसय् सिमाकचा बुया वयाच्वंगु दु । थ्व विश्व सम्पदाया धलखय् दुथ्यानाच्वंगु पशुपति क्षेत्रय् च्वंगु गौरीघाटया प्यंगः शिवालयया लिपांगु अवस्था खः । भुखाय् ब्वये न्ह्यः हे जीर्ण अवस्थाय् थ्यने धुंकूगु व पुनःनिर्माणया निंतिं पियाच्वंगु प्यंगः शिवालय आतक नं थुगु दुरावस्थां मुक्त जुइ फुगु धाःसा मदुनि । प्यंगः शिवालयनापं स्वानाच्वंगु सतःया अवस्था नं उलि हे जीर्ण जुइधुंकूगु दु । जीर्ण जुयाच्वंगु सतलय् धाःसा नेपाल प्रहरीया बिट तयातःगु दु । उलि जक मखसे पवित्र पशुपति क्षेत्रया बागमति सिथय् च्वंगु प्यंगः शिवालय व सत्त जःखःया खालि थासय् फोहर द्वँ चिनाच्वंगु दु । अथे हे श्वेत सतः परिसरया अवस्था नं छुं फरक मजू । देगः जःखः क्वय्या बागमति नवयाः च्वने हे मजिउगु स्थिति दु । दुर्गन्ध गाक्कं न्यनाच्वंगु दु । विश्वन्यंकंया हिन्दूतय् आस्था व मेमेपिं धर्मावलम्बितय् निंतिं नं आकर्षणया केन्द्र पशुपति क्षेत्रया सम्पदाया थज्याःगु दूरावस्थायात कयाः सरोकारवाला निकायं खास हे ध्यान बियाच्वंगु धाःसा मदु । जीर्ण देगः व उकिया जःखःया लागा प्रदूषणया कारणं स्थानीय गौरीनगर सुधार समितिं थनिं प्यदँ न्ह्यःहे पशुपति क्षेत्र विकास कोषलिसें देगः पुनःनिर्माण व जःखःया लागा सुचुकुचु यायेत माग याःगु खः ।

समितिया मागयात कोषं बेवास्ता याःगु समितिया अध्यक्ष मोतीलाल उदासं कनादिल । ‘समितिया माग लिपा कोषं बजेट नं फ्याःगु खः, तर ज्या धाःसा मजुल । कोषं फ्याःगु बजेट नं गन वन धइगु खँय् छुं नं जानकारी मदु’ अध्यक्ष उदासं धयादिल । प्यंगः शिवालयया सतःया जस्तापाता नं कुतुं वयाः भग्नावशेष थें जुयाच्वंगु दु । थाय्थासय् दुना वयाच्वंगु दु । त्वरं नं कुतुं वयाच्वंगु दु । अज्याःगु थाय्या सुरक्षाया निंतिं प्रहरी सहायक निरीक्षक सोमबहादुर सिजालीया नेतृत्वय् खटे जुयाच्वंगु सुरक्षा निकाय थः हे असुरक्षाया सामना यायेत बाध्य जुयाच्वंगु दु । महानगरीय प्रहरी वृत्त गौशालाया प्रमुख प्रहरी उपरीक्षक अनुप श्रेष्ठ भवन जीर्ण जूगुलिं सतःयात भुतुया ज्या कायेगु जक याना वयाच्वनागु धयादी । नयेगु इलय् प्रहरीं हे असुरक्षाया अनुभव यायेमालाच्वंगु वय्कःया धापू दु । ब्यारेक व ज्याकू मेगु भवनय् ल्ह्ययेगु ज्या जुइधुंकूगु वय्कलं धयादिल । सतलय् सुचुकुचु यायेत समितिया छम्ह कर्मचारी प्रदीप थापा व छम्ह सन्त जीर्ण भवनया चुनौतियात स्वीकार यासें च्वना वयाच्वंगु दु । २०७२ साल बैशाख १२ गतेया तःभुखाचं जीर्ण जूगु भवनय् थप क्षति जुल । पुनःनिर्माणया निंतिं कोषं दातायात इनाप नं याःगु खः । संस्कृति व सम्पदाप्रेमी रविन्द्र पुरी प्यंगः शिवालय व उकिया लिक्कंच्वंगु सतः पुनःनिर्माणया जिम्मेवारी कयादीगु खःसां ज्या धाःसा आतक नं न्ह्याके फयाच्वंगु मदुनि ।

दाता पुरीं कोषं तनयार याःगु प्यंगः शिवालय व सतःया पुनःनिर्माण ‘ड्रइङ डिजाइन’ पुरातत्व विभागं स्वीकृत मयाःगुलिं पुनःनिर्माणया ज्या न्ह्याके मफयाच्वंगु धयादी । उखे विभागया अधिकृत देवेन्द्र भट्टराईं धाःसा शिवालय व सतःया ‘ड्रइङ डिजाइन’ स्वीकृतिया निंतिं आतक नं थःपिंथाय् मवःगु दावी यानादी । स्थानीयवासी सीता थापां तःदँ न्ह्यवंनिसें हे जीर्ण जुयाच्वंगु प्यंगः शिवालय दयेकेगु धाःगु नं न्यादँ मयाये धुंकल । पशुपति क्षेत्र लागाय् च्वंगु ५१८ स्मारक मध्ये २०७२ बैशाख १२ गतेया तःभुखाचं ९५ गू स्मारकय् क्षति जूगु खः । उकी मध्ये नं झिंन्यागू स्मारक पूर्णरुपं क्षति जूगु खः । आतकया दुने पूर्ण क्षति जूगु छगू व आशिंक क्षति जूगु मध्ये प्यंगू हे जक सम्पदा दयेकेगु ज्या जूगु कोषं न्ह्यथंगु दु । थौंकन्हय् झिंन्यागू स्मारकया पुनःनिर्माणया ज्या न्ह्यानाच्वंगु दुसा भुखाचं क्षति जूगु पुशपति क्षेत्रया न्ह्य्न्यागू सम्पदा अझं अलपत्रय् लानाच्वंगु दनि । राणा प्रधानमन्त्री जंगबहादुरया किजा कृष्णबहादुर कुँवरं १९२० य् बुद्धि भक्तेश्वर, देव भक्तेश्वर, राम भक्तेश्वर व पद्म भक्तेश्वरया नामय् प्यंगः शिवालय् दयेके बिउगु खःसा उकिया संचालनया निंतिं निजीस्तरं गुथि जग्गाया व्यवस्था नं यानातःगु खः । २०७२ बैशाख १२ गतेया विनाशकारी तःभुखाचं देय्न्यंकंया ७५३ सम्पदा क्षति जूगु खः । उकीमध्ये थौंतकया दुने ८० गू हे जक सम्पदाया पुनःनिर्माण क्वचाःगु राष्ट्रिय पुनःनिर्माण प्राधिकरणं न्ह्यथंगु दु । विश्व सम्पदाय् लानाच्वंगु स्वनिगःया खास्थि पूर्णरुपं दयेकेगु ज्या क्वचाःगु दुसा चाँगुनारायण देगःया पुनःनिर्माण क्वचाये धुंकूगु दु । स्वनिगःया स्वंगुलिं सहरया लाय्कू, स्वयम्भू व पशुपति आपालं थासय् पुनःनिर्माण याये ल्यं दनि ।