ने. सं. ११४६ तछलाथ्व दशमी -

पद्मरत्नया सफू विमोचन

येँ – पुलांम्ह प्रधानमन्त्री लिसें नेकपा अध्यक्ष पुष्पकमल दाहालं मदुम्ह मानव अधिकारवादी नेता पद्मरत्न तुलाधरं देशया लागिं यानादीगु योगदानया तुलनाय् राज्यं यायेमाःगु सम्मान म्हो जूगु खँ कनादीगु दु । म्हिगः च्वमि जितेन्द्र रसिकं च्वयादीगु पद्मरत्न सम्बन्धी सफू ‘सर्वरत्न’ या विमोचन यासें वय्कलं उगु खँ कनादीगु खः ।

वय्कलं पद्मरत्न तुलाधरया नामय् प्रतिष्ठान दयेकेगु धकाः जूगु कुतःयात थःपिंसं सार्थक यायेगु बचं नं बियादिल । ज्याझ्वलय् पुलांम्ह सभामुख दमननाथ ढुंगाना, नेवाः न्ह्यलुवा मल्ल के. सुन्दर, आदिवासी मिसा नेतृ स्टेला तामाङ, मानव अधिकारकर्मी गौरी प्रधानपिंसं भाजु तुलाधरया योगदानयात राज्यं ल्वःमंके मजिउ धासें वय्कःया सम्मानय् राज्यपाखें ज्याखँत यायेमाःगु खँ कनादीगु खः ।