ने. सं. ११४४ बछलाथ्व दशमी -

शंखमुलय् डोजर चले यायेगु निर्णय मनपां क्यने मफुत

येँ (नेपालभाषा टाइम्स)- वंगु पुस २८ गते कुन्हु येँ मनपा ३१ वडाय् छम्ह स्थानीय मनूया जग्गाय् डोजर चले यायेगु विषयय् येँ महानगरपालिकां छुं कथंया निर्णय तकं मयाःनिगु खँ सीदुगु दु ।
उगु जग्गाया थुवाः साहेल सिंह महर्जनं थःगु जग्गाय् डोजर चले यायेत मनपां याःगु निर्णया कपी माल धकाः मनपा ज्याकुथिइ काः वंबलय् मनपां वय्कःयात कपी तकं मबिसे आलटाल याना हःगु खँ धाःगु दु ।

पुस २८ कुन्ह शंखमुलय् लँ तब्या यायेगु धकाः मनपाया नगर प्रहरीं डोजर हयाः स्थानीय साहेल सिंह महर्जनया निजी जग्गाया पःखाः थुना बिउगु खः । थःगु जग्गाय् डोजर चले यायेवं वय्कलं थ्व पःखाः थुनेगु लागिं मनपां याःगु निर्णयया पत्र माल धकाः माग यानादीगु खःसा नगर प्रहरीया प्रमुख राजु पाण्डें पत्र माःसा मनपाया ज्याकुथी झासँ धाःगु खः । वय्कःया हे खँ न्यनाः पीडित महर्जनया छेँजःपिं मनपाया ज्याकुथी निर्णयया कपी काः वंगु खःसा मनपां वय्कःयात अज्याःगु कपी बी मफुगु खँ पीडित महर्जनं ‘नेपालभाषा टाइम्स’ यात कनादिल ।

मनपाया कर्मचारीतय्सं कपी मबिउगुलिं वय्कःपिं मेयर बालेन साहयात नापलायेत वय्कःया ज्याकुथी वंबलय् मेयर साहं नं नाप तकं मलासे लित छ्वया हःगु खँ धाःगु दु ।

मनपाया ज्याकुथी हे वनाः काः वनं तकं पत्र मबिउगु कारणं वकुन्हु मनपां डोजर हयाः थःगु जग्गाया पःखाः थुनेगु गुगु ज्या याःगु खः, व पूर्ण रुपं अवैध व गैर कानुनी खः धकाः प्रमाणित जूगु खँ नं महर्जनं यानादिल । आः थुकिया विरुद्ध गय् यानाः न्ह्याः वने माली धकाः थःपिंसं कानुन व्यवसायीतलिसे खँ ल्हानाच्वनागु खँ नं वय्कलं कनादिल ।

मनपां वय्कःया १२ आना जग्गा कब्जा यानाः १३ फिटया लँयात २६ फिट दयेकेगु कुतः यानाच्वंगु खः । मनपां थ्व ज्या जग्गा दलालतलिसे मिले जुयाः यायेत्यंगु अनुमान याना हःगु दु ।
मेयर साहया थज्याःगु ज्यादतिया विरुद्ध माघ १५ गते येँया फिब्व ख्यलय् वृहत् प्रदर्शन जुइत्यंगु दु ।