नेवाः सांसदत राजीनामाया मनस्थितिइ

हेटौंडा – ३ नं. प्रदेशया नामाकरण यायेगु लागिं सत्तारुढ दल नेपाल कम्युनिष्ट पार्टीं बल प्रयोग यानाः मेगु फुक्क नांयात छखे वांछ्वयाः ‘बागमति’ प्रदेश छगूयात जक छलफलय् यंकेगु तयारी याःगुलिं पहिचानया आन्दोलनय् सहभागी जुया वयाच्वंपिं उगु पार्टीया छुं सांसदत आः सांसद पदं राजीनामा हे बीगु तकया मनस्थितिइ थ्यनाच्वंगु खँ सीदुगु दु ।

प्रदेशया नां ‘नेपालमण्डल’ जुइमाः धकाः छुं ई न्ह्यः प्रदेश ३ या संसदय् सांसदपिं डा. अजय क्रान्ति शाक्य व बसन्त मानन्धरपिंसं प्रस्ताव दर्ता यानादीगु खःसा उकियात केशव स्थापित, राजेश शाक्य लगायत च्याम्हेस्यां समर्थन याःगु खः । आः पार्टीपाखें थ्व प्रस्तावयात छलफलय् तकं मयंकुसे छक्वलं ‘बागमति प्रदेश’ दर्ता यायेगु तयारी याःगुलिं नेपाल मण्डल प्रदेशया प्रस्तावक समर्थक जुयादीपिं सांसदत डा. अजयक्रान्ति शाक्य, राजेश शाक्य व बसन्त मानन्धरपिंसं सांसद पदं हे राजीनामा बीगु तकया मनस्थिति दयेकूगु खँ सीदुगु दु । यदि सत्तारुढ दलं आः जबर्जस्ती बागमति प्रदेश कायम यात धाःसा पहिचान आन्दोलनयात पूवंक हे अपमान याःगु ठहर जुइ धासें वय्कःपिंसं राजीनामा हे बीगु मनस्थिति दयेकूगु खँ धाःगु दु । हेटौंडाय् वय्कःपिनि दथुइ थुकियात कयाः सघन सहलह जुयाच्वंगु खँ नं सूत्रं धाःगु दु ।

न्हापा दर्ता जूगु प्रस्तावत अवैध
येँ – प्रदेश नामाकरणया सवालय् प्रदेश संसदया सचिवालयय् न्हापा दर्ता यानातःगु प्रस्तावत फुक्कं अवैध जूगु खँ धाःगु दु । प्रदेश संसदं म्हिगः तिनि प्रदेशया नामाकरण सम्बन्धी कार्यविधि पारित याःगु जूगुलिं थ्व कार्यविधि बमोजिम सभामुखं प्रस्ताव आह्वान मयाःतले न्हापा दर्ता जुयाच्वंगु प्रस्ताव अवैध ठहर जुइगु खँ संसद सचिवालयं धाःगु दु । थुकिया नापं नेकपां पार्टीपाखें हे बागमति प्रदेश नामाकरण यायेगु धकाः निर्देशन बीधुंकूगु कारणं आः पार्टीया सुं नं सांसदं मेगु कथंया प्रस्ताव दर्ता याये दइ मखु धकाः नं उजं बिया हःगु खँ सीदुगु दु ।