येँ मनपाय् स्वरोजगारया निंतिं २७० गु आवेदन
येँ – येँ महानगरपालिकाय् प्रधानमन्त्री स्वरोजगार कार्यक्रमया निंतिं २७० गू आवेदन दुहां वःगु दु । येँ महानगरपालिकां थन छगू ज्याझ्वः यासें उकिया जानकारी याकूगु खः । मनपां ग्वसाः ग्वःगु ज्याझ्वलय् वडा नं. १ निसें २७ तकया दुनेयापिंसं २७० गू आवेदन फाराम जायेकूगु जानकारी बिउगु खः ।
येँ मनपां प्रधानमन्त्री स्वरोजगार ज्याझ्वः व येँ मनपाया आर्थिक दँ २०७६÷०७७ या बजेटया सम्बन्धय् जूगु ज्याझ्वलय् उगु जानकारी बिउगु खः । महानगरया ३२ गू वडामध्ये वडा नं. २८, २९, ३०, ३१ व ३२ न्यागू वडां धाःसा छगू नं निवेदन दुहां मवःगु मनपां न्ह्यथंगु दु ।
ज्याझ्वलय् नवासें येँ मनपा प्रमुख विद्यासुन्दर शाक्यं न्हापांखुसी थुकथंया ज्याझ्वः हःगुलिं यानाः उकियात सफल यायेत सकसिगु ग्वाहालि दयेमाःगु धासें ज्याझ्वः ताःलाकेया निंतिं निजी ख्यःलिसे सहकार्य यानाः ज्याझ्वः न्ह्याकेमाःगु विचाः तयादिल ।
महानगरया उपप्रमुख हरिप्रभा खड्गी श्रेष्ठं सरकारं हःगु थुकथंया ज्याझ्वः न्हापांखुसी जूगुलिं यक्वसित थुकिया बारे बांलाक जानकारी मदुगु खँ धयादिल । लिसें वय्कलं ज्याझ्वःया जानकारी बीगु निंतिं उकथंया हे ज्याझ्वःत संचालनय् हयेमाःगु आवश्यक जूगु कुलादिल ।
येँ मनपाया प्रमुख प्रशासकीय अधिकृत केदार न्यौपानें मनपाय् दुहां वःगु आवेदनया ल्याः संख्यात्मक ल्याखं स्वयेगु खःसा तसकं म्हो जूगु धासें छुट जूपिंत दुथ्याकेगु निंतिं म्याद थप यायेमाःगु धयादिल । वंगु बैशाख १ गते प्रधानमन्त्री केपी ओलीं उलेज्या यानादीगु थुगु ज्याझ्वःया निंतिं आवेदन बीगु म्याद थ्व हे बैशाख मसान्ततकया दुने बियातःगु दु । दुहां वःगु आवेदनया आधारय् वइगु आर्थिक दँनिसें लाभग्राही परिचय पत्र बीगु जुइ ।
LEAVE YOUR COMMENTS