जागरण मञ्चया भाषा आयोगलिसे अन्तक्र्रिया
येँ(नेपालभाषा टाइम्स)÷नेवाः जागरण मञ्चया ग्वसालय् भाषा आयोगलिसे छगू अन्तक्र्रिया ज्याझ्वः जूगु दु । मञ्चया ग्वसालय् वंगु शुक्रवाः नेपाः ब्यांक्वेटय् उगु ज्याझ्वः जूगु खः ।
ज्याझ्वलय् नवासें नेवाः न्ह्यलुवा मल्ल के. सुन्दरं महाकवि सिद्धिदास महाजुया इलंनिसें न्ह्यानाच्वंगु भाषिक अधिकार प्राप्तिया आन्दोलन आः वयां छुं हदतक पूवंगु दुसां थ्व आन्दोलन दिउगु धाःसा मदुनि धयादिल । थौं झीत गुलि नं अधिकार प्राप्त जूगु दु व धइगु हे सिद्धिदास महाजु थेंज्याःपिं पुर्खापिंसं निरन्तर याना वंगु त्याग व तपस्यापाखें प्राप्त जूगु खः धासें प्राप्त अधिकारया संरक्षणया नितिं भाषा आयोगयात ग्वाहालि यायेमाःगु खँ धयादिल ।
भाषा आयोगयात ज्या यायेत सहज वातावरण दयेका बीमाः धासें आयोग विरुद्ध हे आन्दोलन यायेगु ख्याच्वः छथ्वःसिनं बिया वयाच्वंगु असान्दर्भिक जूगु नं वय्कलं धयादीगु दु ।
भाषा आयोगया दुजः सुरेश मानन्धरं आयोग दुने आपालं व्यवधानत दयाच्वंगु व उकियात आयोग याकःचां जक चिइकाः वनेगु सम्भव मदु धासें आयोगं थःगु हे रफ्तारं ज्या यानाच्वंगु दु धयादिल । आयोगं याकनं हे बहुभाषी सम्मेलन यायेगु निंतिं सहलह जुयाच्वंगु जानकारी बियादिसें आयोगया दुजः मानन्धरं नेपालभाषायात सरकारी कामकाजीस्तरय् छ्यलेत गन छु याये फइ, छु यायेमाः आयोगं यायेमःगु ज्या छु छु जुइ धइगु सुझाव बियादीत इनाप यानादिल ।
आयोग दुनेया व्यवधान चिइकाः आयोग याकःचा न्ह्याः वनेत थाकुइगुलिं सरोकारवालातसें सचेत जुयाः ग्वाहालि यायेत नं वय्कलं इनाप यानादीगु दु ।पुलांम्ह मन्त्री राजेन्द्रप्रसाद श्रेष्ठं थौंकन्हय् ‘एआई’ जमाना जूगुलिं आः भाषायात नं प्रविधिमैत्री दयेकायंकेमाःगु सुझाव बियादिल ।
नेपालभाषा एकेदेमिया सदस्य सचिव डा. पुष्पराज राजकर्णिकरं ऐन कानून पारित यायेगु ज्या जुइधुंकाः नं उकथं ज्या मजुइगु व याके मबीगु प्रवृत्ति हावी जुयाच्वंगु प्रति सचेत यानादिसें सकसिनं ध्यान बियाः ज्या यायेत इनाप यानादिल ।
बागमति प्रदेशया पुलांम्ह मन्त्री शैलेन्द्रमान वज्राचार्यं थः मन्त्री जुयाच्वनागु इलय् भाषा, संस्कृतिया विकासया निंतिं फक्व पहल यानाः बजेटयातकं व्यवस्था यानागु जानकारी बियादिल ।
नेवाः देय् दबूया न्वकु उमेश स्थापितं उपलब्ध बजेटपाखें भाषिक पाठ्यसफू निर्माण, खँग्वःधुकूया प्रकाशनलिसें आवश्यककथंया कर्मचारी व्यवस्थापनया निंतिं ज्या जुयाच्वंगु जानकारी बियादीगु खः ।
LEAVE YOUR COMMENTS