ने. सं. ११४४ कौलाथ्व तृतीया -

ऐतिहासिक नृसिंह जात्रा क्वचाल

यल- गुंपुन्हि धुनेवं पंचमिकुन्हु न्यायेकीगु ऐतिहासिक नृसिंह जात्रा क्वचाल । कोरोना संक्रमणया जोखिमयात ध्यानय् तयाः स्वास्थ्य सुरक्षा मापदण्ड पालना यानाः न्ह्याकूगु जात्रा वंगु शुक्रवाः क्वचाःगु खः ।

जुजु सिद्धिनरसिंह मल्लया पालंनिसें संचालन जुया वयाच्वंगु जात्रा थनया राजोपाध्याय समुदायपाखें पिथनीगु खः । थनया गाःबहाःस्थित दुने चुकय् थुगु जात्राया विशेष आकर्षण नृसिंहयात विशेषकथं तान्त्रिक पुजा यानाः शुरु जुइगु थ्व जात्रा यलया सायाः चाःहिलीगु थीथी लँपु गाःबहाः, पिम्बहाः, क्वन्ति, क्वबहाः मंगलबजाः, लुँहिति, इकुबआः महाबू, टंगः त्वाः, तिच्छुगल्ली, हौगः, इखालखु, पूर्णचण्डी जुयाः गाःबहालय् थ्यंकाः क्वचायेकूगु खः । उपांकलः सायाःलय् विशेष आकर्षण नृसिंहलिसें लक्ष्मी, सरस्वति, भक्त प्रल्हाद दइ ।

यलया खुगू कुलया राजोपाध्याय समुदाय ज्येष्ठताया लिधंसाय् पालंपाः सकसिनं व्यवस्थापन यायेकथं उपांकलः सायाः पिथनेगु याना वयाच्वंगु दु । थ्व ल्याखं थुगुसी थ्व सायाः पिथनेगु पाः गाःबहाःया कोमलेशानन्द राजापोध्यायया परिवारं संचालनया जिम्मा काःगु खः ।

ने.सं. ७५१ निसें निरन्तर रुपं न्ह्यानाच्वंगु थ्व जात्राया निंतिं माःगु सकतां व्यवस्थापन व आर्थिक भार पाःलाः स्वयमं काइगु खःसां लिपांगु इलय् जात्रायात अझ व्यवस्थित यायेत उपाकर्म गुथि व्यवस्थापन समिति गठनलिसें अक्षय कोष नं स्थापना यानातःगु दु । थुगु जात्राय् नृसिंह जुइम्ह पाःलाःया जिलाजं वा भिनामस्त जक जुइमाःगु चलन दु ।