कोरोनां सीपिनि ल्याः विवादास्पद

येँ (नेपालभाषा टाइम्स) – कोरोना संक्रमणया कारणं नेपालय् गुलि मनू सित धइगु बारे सरकारी निकायं सार्वजनिक याःगु तथ्यांक हे विवादय् लाःगु दु । स्वास्थ्य मन्त्रालयं सार्वजनिक याःगु तथ्यांक व नेपाली सेनां शव व्यवस्थापन याःगु तथ्यांक बिस्कं बिस्कं वयेवं नेपालय् कोरोना संक्रमणया कारण सीपिनिगु वास्तविक तथ्यांक छु खः धइगु न्ह्यसः ब्वलंगु खः ।

वंगु शुक्रवाः तक नेपाली सेनां सार्वजनिक याःगु तथ्यांक कथं २ हजार १७९ म्ह सीम्हेसिया व्यवस्थापन यायेधुंकूगु दु। तर स्वास्थ्य तथा जनसंख्या मन्त्रालयया तथ्यांक कथं नेपालय् कोरोना संक्रमणया कारणं सीपिं १ हजार २७६ म्ह जक दु । मन्त्रालय व नेपाली सेनाया तथ्यांक कथं सीपिनिगु ल्याः ९०३ म्ह पानाच्वंगु दु । थ्व स्वयां न्ह्यः नं सेना व स्वास्थ्य मन्त्रालयं पिथंगु सीपिनिगु ल्याः पानाच्वंगु खःसा उकियात कयाः थप अनुसन्धान यायेगु खँ धाःगु खः । तर आः वयाः नं सेना व स्वास्थ्य मन्त्रालयं पिकाःगु तथ्यांक बिस्कं बिस्कं खनेदयेवं नेपालय् कोरोना भाइरसया संक्रमणया कारणं सीपिनिगु ल्याः गुलि खः धइगु स्पष्ट मजूनि ।

कोरोना भाइरस संक्रमण जुयाः सीपिनिगु शव व्यवस्थापन नेपाली सेनां यानाच्वंगु दु। सेनां बिउगु तथ्यांक कथं सेनां सीपिनिगु ल्याः सार्वजनिक यानाच्वंगु खः । तर स्वास्थ्य मन्त्रालयं धाःसा देय्न्यंक सीपिनिगु ल्याः संकलन यायेगु ज्या तकं पूवंक यायेमफुगु खः ला धइगु न्ह्यसः ब्वलनाच्वंगु दु ।