मेट्रो चले यायेत छगू जक प्रस्ताव

येँ – स्वनिगलय् मेट्रो रेल दयेकाः सञ्चालन यायेगु निंतिं मुक्कं छगू जक प्रस्ताव वःगु दु । वंगु चैत १५ व १६ गते येँय् जूगु लगानी सम्मेलनय् न्ह्यब्वःगु आयोजना मध्ये स्वनिगलय् मेट्रो रेल सञ्चालन नं दुथ्याःगु खः । आः मेट्रो रेल चले यायेगु परियोजना दयेकेगु निंतिं छगू जक लगानी प्रस्ताव वःगु खः ।

स्वनिगःया ७७ दशमलव २८ किलोमिटर दुरीइ मेट्रो रेल दयेकेगु निंतिं प्रस्ताव दर्ता यायेत म्हीग शनिवाः तकया ई बियातःगु खः । तर सम्मेलनय् वःगु छगू प्रस्ताव बाहेक उगु परियोजनाय् मेपिं धाःसा चिउताः क्यंगु मदु । बुट मोडेलय् दयेकीगु येँया मेट्रो रेल परियोजनाया निंतिं ३ खर्ब ३१ अर्ब ९२ करोड तकाया लागत प्रस्ताव यानातःगु दु । लगानी बोर्डया बिहीवाः च्वंगु ३७ क्वःगु बैठकं रेल सहित मेगु परियोजनाय् नं लगानी प्रस्ताव यायेत थप लछिया ई बिउगु दु ।

थप जूगु ईया दुने नं आवेदन मवल धाःसा आः वःगु छगू जक प्रस्तावया मूल्यांकन यानाः प्रक्रिया न्ह्याकेगु तयारी बोर्डं यानाच्वंगु दु । लगानी बोर्डं उगु परियोजनाया निंतिं ५ खर्ब ४७ अर्ब १७ करोड तका खर्च जुइगु अनुमान प्रक्षेपण यानातःगु दु ।
थुुगु रेल न्हिं नीघौ तक सञ्चालन यायेगु योजना दु ।

येँय् मेट्रो रेल सञ्चालनय् वयेधुंकाः न्हिं १ लाख १९ हजार यात्रु ओहोर दोहोर याइगु नं प्रक्षेपण यानातःगु दु ।
सार्वजनिक–निजी साझेदारी (बुट) मोडेलय् दयेकीगु मेट्रो रेलया विस्तृत अध्ययन प्रतिवेदन दछिया दुने तयार यानाः न्यादँया दुने रेल मार्ग दयेके क्वचायेकेगु आज्जु तयातःगु दु । येँ महानगरपालिकापाखें येँय् मोनोरेल सञ्चालन यायेगु लागिं नं तयारी न्ह्याकाच्वंगु दु । चिनियाँ कम्पनीलिसे जूगु सहमति कथं आः चक्रपथ चाःहिली कथं मोनो रेलया डीपीआर दयेकेगु ज्या जुयाच्वंगु दु ।

सम्बन्धित बुखँ

LEAVE YOUR COMMENTS