भाषाथुवाः व विहार थुवाः

#भिक्षु अश्वघोष महास्थविर

गौतम बुद्धं बरोबर धयाबिज्याइगु छगू दु–‘अचिन्तिताम्पि भवति, चिन्तिताम्पि विनस्सति’ अर्थात मती मलूगु जू, मती लूगु मजू । जितः मती हे मलूगु छगू जुल । व छु धाःसा –नेपालभाषा परिषदं जितः भाषाथुवाः मानार्थ पदबी बिल । मती मलूगु धयागु नेपालभाषाया बारे आपालं ज्ञां दुम्ह विद्वानम्हेसित भाषाथुवाः पदवी बीगु खः ।

जि नेपालभाषाया विद्वान मखु । छाय् धायेबलय् जिगु नेवाः भाय् तालय् मलाः । अथे धयागु व्याकरण मिले मजू व जिगु भासय् एकरुपता नं मदु । (सन्ध्या टाइम्सय् छापे जुइगु जिगु नेवाः भाय् मखु ।) उकिं भाषाथुवा पदवी बिइगु छतिं हे आशा मदु ।

खः जा जितः नेपालभाषा परिषद्ं बिउगु भाषाथुवाः उपाधिया हनापती च्वयातःगु दु, ‘बुद्धधर्म व नेपालभाषाया माध्यमं थःगु मांभासं धर्मदेशना यानाः, सफू च्वयाः मदिक्क खुगूत्या दशक न्ह्यवंनिसें सेवा यायां राष्ट्रिय सभाय् थ्यंक नं सभासद् जुयाः थःगु भाषा व बुद्धधर्मया प्रचार प्रसार यानाबिज्याःम्ह छलपोलया सेवायात हनाबना तसें नेपालभाषा परिषदं बिया वयाच्वंगु मानार्थ उपाधि ने.सं. ११२८ या भाषाथुवाः थपाले छलपोलयात देछायेगु क्वःजिउगु जुल ।’

न्हिथं मदिक्क छलपोलया च्वसा व धर्मदेशना न्ह्यानावं च्वनेमा धयागु मनंतुसें भाषाथुवाः मानार्थ उपाधि लिसें थुगु हनापौ देछायाच्वना ।
सचिव –अष्टमुनि गुभाजु, अध्यक्ष फणीन्द्ररत्न वज्राचार्य । नेपालभाषा परिषद् ।थुगु मानार्थ उपाधी पौ कथं भाषा व्याकरण पारंगत जुइमाःगु खनेमदु । धर्म व मांभाय्या प्रचार व सेवा यायेमाःगु जक खनेदु ।

सुभाय् दु नेपालभाषा परिषद्यात । जितः गौरव ताः जिं बुद्धं कनाबिज्याःगु धर्म व मांभासं बासलं मल्याक सफू च्वयाः नं छापे जुइधुंकूगुलिं व जितः नेपालभाषा परिषदं मानार्थ उपाधि प्रदान याःगुलिं ।थुगु मानार्थ उपाधि बीगु धइगु सुनां नं बांलाःगु ज्या याःगुया मूल्यांकन खः । उत्साह अप्वइगु ज्या खः । थ्व लोकाचार नं खः ।

अथे धयागु च्वछायेबहगु खँ खः । प्रशंसा धयागु न्ह्याम्हेस्यां यः । जितः छम्हनिम्हेसिनं धाल, ‘भन्तेया लेख च्वयेबलय् व सफू च्वयेबलय् थःगु खँ अप्वः हे खना । मनय् वयेवं काचाक्क कलमं मच्वःसां जिउ थें च्वं ।’थथे धाःगु न्यनाः जिं थःगु हे थःम्हं प्रशंसा जक यानागु जुल ला ? जिं अनात्मवादी ला खः, तर थुकथं थःगु हे जक खँ कयाः लेख व सफू च्वयागुलिं जि नं आत्मवादी जुल ला धयाथें च्वन ।

छाय् धायेबलय् थःगु जक बयान यायेगु जकं जुल ला ? जि ला अलमलय् लानाच्वन ।थौंकन्हय् विहार विहारय् दातापिनिगु व उपासक उपासिकापिनिगु प्रशंसा यायेगु व प्रशंसा पत्र बीगु ज्या जुयाच्वंगु खनेदु । मनूत लय्तायेकेगु व मनू साला कायेत थज्याःगु ज्या माः थें च्वनावल ।

गनं गनं विहार निर्माण जुयाच्वंथाय् चन्दा म्हयेगु ज्या जुयाच्वंथाय् फलानाम्हेस्यां थुलि ध्यबा दान बिल धयागु घोषणा यातकि धमाधम चन्दा बीपिं न्ह्यज्यानाच्वंगु खनेदु । थ्व लोकाचार नं खः, माःगु नं चलन थें च्वं । थुथाय् बुद्धवचन लुमंसे नं वल – ‘अञ्ञाही लाभूपनिसा, अञ्ञानिब्वाणगामिणी’ अर्थात लाभ सत्कारया लँपु मेगु हे, निर्वाणया लँपु मेगु हे खः ।

ई ब्यः हिल । आधारभूत आवश्यकता जक पुरे जुयां मगानावल । एकान्तय् ध्यान जक याना मच्वंसे मेमेगु सामाजिक सेवाय् नं ल्हाः तया च्वनेमाल । जि छम्ह भिक्षु धर्मप्रचारक खः । बाखं कनेबलय् निर्वाणया खँ नं न्ह्यथनाच्वना नापं दान बीमाःगु खँ नं न्ह्यथनाच्वना । करपिनि भरोसाय् म्वाना च्वनेमाःगु भिक्षु जीवन ।

थःगु तुतिं थम्हं चुइ मफुनि । धर्मया सफू छापे यानाः इनाबीगु ज्या नं यानाच्वना, विहारय् कर्मचारी तयाः तलब व ज्याला नं बीमाः ।
जितः भाषाथुवाःया नापं विहार थुवाःया पदवी नं दत । थुगु पदवी समारोह यानाः सुनां नं बिउगु मखु । संघाराम विहारया थुवाः जुयाच्वंम्ह अनागारिका धर्मरक्षिता गुरुमां आकाझाकां मंत ।

वसपोल मदुगुलिं स्वतः विहार थुवाः जुइमाल । संघारामया स्थापना याःपिं निम्ह दु । भिक्षु अश्वघोष व भिक्षु मैत्री । संघारामया दाता जूपिं निम्ह खः द्वारिकादास श्रेष्ठ व धर्मरक्षिता अनागारिका गुरुमां । आः भिक्षु मैत्री लुम्बिनीइ च्वनाबिज्यात । जि थकालिम्ह नं खः । उकिं जि विहार थुवाः जुइगु करं क्यन ।

थौंकन्हय् संघारामय् प्यम्ह न्याम्ह भिक्षुपिं दु । फुकसिगुं नयेत्वनेया जिम्मा जिगु हे ब्वहलय् लात । जितः दान प्राप्त दक्षिणा भिंथाय् छ्यले दयाः आनन्द तायाच्वन । जितः दान बिउपिं उपासक उपासिकापिंत नं पूण्य धर्म लाइगु जुल । सकसियां भिं जुइमाः, निरोगी जुइमा । थज्याःगु ज्याय् ल्हाः तयाच्वनागुलिं लोभी नं जुयावल ।

अथे धकाः ध्यबा मुंकेगुली लगे जुयागु मखु, थुगु लेखय् नं थःगु खँ जक अप्वः जूगुलिं जिं आत्मवादी जुल ला धइथें शंका जू । आत्मवादी धयागु अहंकारी जुइगुयात धाइ धइगु जिगु धारणा खः, विश्वास खः । थःगु बारे जक खँ अप्वः न्ह्यथनाः प्रचार यानाच्वनेगु नं अहंकारया लक्षण खः, चिं खः । अखबारय् थःगु लेख पिहां वलकि निकः स्वकः ब्वने मास्ति वयाच्वनीगु ।

थथे जुइगु नं अहंभावं यानाः खः थें च्वं । जि, जिगु धइगु क्वातुक ज्वनाच्वनेगु बानीं यानाः खः । जितः लय्ताः वः संघारामं उत्पादन जूपिं भिक्षुपिनिपाखें धर्म प्रचारया ज्या जुयाच्वंगु सन्तोषजनक जू ।

उपिं भिक्षुपिं खः, भिक्षु भद्दिय, भिक्षु सोभित, भिक्षु सद्धातिस्स, भिक्षु कोनित, भिक्षु आनन्द, भिक्षु कोण्डन्य, भिक्षु संघरक्षित, भिक्षु विशुद्धानन्द (प्राशयुक्त), भिक्षु सुशील, भिक्षु अशोक, भिक्षु मिलिन्द, भिक्षु त्रिरत्न, भिक्षु विनित (अमेरिकाय्), भिक्षु मंगल (ताइवानय्), भिक्षु उपतिस्स (अष्ट्रेलियाय्) झिदँ धर्म प्रचार यानाः आः संघारामय् दु ।

लिसा छकू काये, जिं खँय्भासं सफू च्वयाच्वनागु नं खँ भाय् यक्व सयाः मखु । जितः नेपालभाषा प्रेमीपिंसं खँय् भिक्षु धाइगु । नेवाः मखुपिं जनजाति, शेर्पा, तामांग, गुरुंग व थारु आदि जातिपिं बुद्धया धर्म थुइका बीत खः । जिगु खँय् भाय् शुद्ध याना बीगु प्रा. सुवर्ण शाक्यं खः । खय्त ला जिगु अप्वः यानाः छापे जुइधुंकूगु सफू नेवाः भाय्यागु खः । थुलि हे जक च्वयाः खँ क्वचायेकाच्वना ।
ने.सं. ११२९ यंलागा १० या सन्ध्या टाइम्सपाखें

सम्बन्धित बुखँ

LEAVE YOUR COMMENTS