च्वबहालय् आर्यावलोकितेश्वर भगवान बुद्धया प्रतिमा थापना

किपू-  च्वबहालय् आर्यावलोकितेश्वर भगवान बुद्धया प्रतिमा स्थापना याःगु दु । किपू नगरपालिका वडा नं. ६ च्वबहालय् च्वंगु करुणा अध्ययन तथा धर्म साधना केन्द्रय् वंगु शनिवाः छगू ज्याझ्वःया दथुइ आयोवलोकितेश्वर भगवान बुद्धया प्रतिमा स्थापना याःगु खः ।

यलय् दयेकूगु ४ फिट ८ इन्चया आर्यावलोकितेश्वर बुद्ध मूर्तियात च्वबहाःया फोसिगांतक हःगु खःसा अनं थीथी सांस्कृतिक बाजंलिसें नगर परिक्रमा यानाः केन्द्रय् उगु बुद्ध मूर्ति स्थापना याःगु खः ।
मूर्ति स्थापना ज्याझ्वलय् किपू नगरपालिकाया प्रमुख रमेश महर्जन, वडा नं. ९या वडाअध्यक्ष गंगाराम महर्जनलिसें आपालं उपासक उपासिकापिनिगु उपस्थिति दुगु खः ।

ज्याझ्वलय् नवासें किपू नगरपालिकाया प्रमुख महर्जनं विश्व शान्तिया प्रतीक भगवान बुद्धया प्रतिमा स्थापना यायेगु ज्या च्वछायेबहजू धयादिल । लिसें वय्कलं किपू नगरपालिकापाखें नं आवश्यक ग्वाहालि यायेगु प्रतिवद्धता प्वंकादिल ।

केन्द्रया गुरु बुद्ध महर्जनं लसकुस यानादीगु ज्याझ्वलय् मूर्तिया दाता विजय महर्जनं च्वबहाः थेंज्याःगु यइपुसे च्वंगु थासय् बुद्धया प्रतिमा स्थापना यायेगु ज्या बांलाःगु जक मखसे थःपिनिगु निंतिं छगू सौभाग्य हे जूगु धयादिल ।

च्वबहाःया स्थानीयावासीलिसें केन्द्रया गुरु महर्जन छुं दँ न्ह्यः बुद्ध शिक्षा प्रािप्तया निंतिं भारत झायादीगु इलय् वय्कलं गुरु जुइगु तकया अध्ययन यानादीगु खः । भारतं लिहां वयेधुंकाः वय्कः व च्वबहाःया हे आनी धनदेवी महर्जनया कुतलय् धर्मप्रति आस्था तइपिं भक्तजनय् ग्वाहालि कयाः च्वबहालय् करुणा अध्ययन तथा धर्म साधना केन्द्र स्थापना याःगु खः ।
केन्द्रय् थौंकन्हय् दिवा ध्यान केन्द्र, बाल विकास केन्द्र व ज्येष्ठ नागरिक दिवा सेवा केन्द्र लगायत थीथी सामाजिक गतिविधि संचालन जुयाच्वंगु दु ।

सम्बन्धित बुखँ

LEAVE YOUR COMMENTS