बाजंया बोल लःल्हानाः धिमे प्रशिक्षणया उलेज्या
किपू(नेपालभाषा टाइम्स)÷किपू नगरपालिका वडा नं. १० य् ल्याय्म्हपुस्तायात लक्षित यानाः धिमे प्रशिक्षण न्ह्याःगु दु । १० वडाया तःननि, चिथु विहार व भरियांपुखुसि स्वंगू त्वाःया ल्याय्म्हतय्त कःघानाः उगु धिमे प्रशिक्षण न्ह्याकीगु खः ।
किपू नगरपालिका वडा नं. १०, तःननि दाफा खलः व सनस्टार क्लबया मंकाः ग्वसालय् न्ह्याःगु धिमे प्रशिक्षण वडाअध्यक्ष नरेश महर्जनं धिमे गुरुपिंत बाजंया बोल लःल्हासें प्रशिक्षणया उलेज्या यानादीगु खः ।
धिमे प्रशिक्षण मू गुरुपिं कविन महर्जन, राजन महर्जन, मुकेश महर्जन व नविन्द्र महर्जन अथे हे सहायक प्रशिक्षककथं लकस महर्जन व मिडेल श्रेष्ठं प्रशिक्षण बियाच्वनादीगु दुसा प्रशिक्षणय् स्वंगू त्वाःया करिब ३० प्रशिक्षार्थीतय्सं प्रशिक्षण कयाच्वंगु क्लबं जानकारी बिउगु दु ।
किपुलिइ दँय्दसं न्हूदँ हनेगु भाला त्वाः त्वालं कया वयाच्वंगुलिइ थुगुसी नेपाल संवत् ११४३ न्हूदँ हनेगु नापं किपूया धार्मिक व सांस्कृतिक महत्वं जाःगु दकलय् तःधंगु जात्राकथं कयातःगु इन्द्रायणी जात्रा न्यायेकेगु नं स्वंगू हे त्वाःया पाःलाःगुलिं उकियात हे ध्यानय् तयाः धिमे प्रशिक्षण न्ह्याकूगु खः । जात्रा सभ्य व भव्य रुपं हनेगु निंतिं स्वंगू हे त्वाःया ल्याय्म्हतय्त लक्षित यानाः प्रशिक्षण न्ह्याकागु मुख्य प्रशिक्षक कविन महर्जनं जानकारी बियादीगु दु ।
धिमे प्रशिक्षणया उलेज्याझ्वलय् वडाअध्यक्ष महर्जनलिसें वडा सदस्यपिं ज्ञानेश्वर महर्जन, धिमे प्रशिक्षणया संयोजन याना वयाच्वंगु क्लबया नायः हिराकाजी महर्जन ग्वाहाल संस्था तःननि दाफा खलःया नायः दिलिपकुमार महर्जन लगायतया उपस्थिति दुगु खः ।
LEAVE YOUR COMMENTS