श्रम मन्त्रालयय् कल सेन्टर सुरु

येँ – श्रम व रोजगार क्षेत्रया गुनासोयात तत्कालन सम्बोधन यायेगु ताः तयाः श्रम तथा रोजगार मन्त्रालययं मंगलवाः निसें कल सेन्टर संचालनय् हःगु दु । वैदेशिक रोजगार बोर्ड सचिवालयय् व्यवस्थापनय् संचालनय् हःगु उगु कल सेन्टरय् मार्फत सरकारयात सरोकारवालातय्सं श्रम सम्बन्धी छुं समस्या, जिज्ञासा, गुनासो, सुझाव बीफइगु खँ धाःगु दु । कल सेन्टरया उलेज्या मंगलवाः श्रम, रोजगार तथा सामाजिक सुरक्षामन्त्री गोकर्ण विष्टं यानादीगु खः ।

मन्त्रालयया प्रवक्ता डा. नारायण रेग्मी वैदेशिक रोजगारीइ ठगे जुइकेमाःपिं लिसें थीथी समस्याय् लानाः न्याय मालाच्वंपिं, विदेशय् अलपत्रय् लानाच्वंपिं वा स्वास्थ्य समस्या जुयाः छेँय् लिहां वये चाहे जूपिं, अलपत्रय् लानाच्वंपिं ज्यामित छेँय् लिहां वये चाहे जूसां, ज्याया झ्वलय् विदेशय् सीपिनि शव नेपाः लित हयेमाः, मखुगु मुद्दा लानाः जेल लानाच्वंपिं ज्यामितय् निःशुल्क कानुनी सेवा आवश्यक जुल धाःसा नं थ्व कल सेन्टर मार्फत ग्वाहालिया निंतिं सरकारयात इनाप यायेफइगु खँ धाःगु दु ।

अथेहे वैदेशिक रोजगार लिसे सम्बन्धी पूर्वप्रस्थान अभिमुखीकरण, सीप विकास तालिम, वैदेशिक रोजगारीइ सुरक्षित रुपं वनेत नालेमाःगु प्रक्रिया, सरकारपाखें स्वीकृति कयातःगु निजी संघसंस्थाबारे नं थ्व कल सेन्टर पाखें जानकारी कायेफइगु खँ धाःगु दु ।

थुकिया लिसें योगदानय् आधारित सामाजिक सुरक्षा कार्यक्रमय् सहभागी जुइगु प्रक्रिया, कार्यक्रम कायान्वयनय् वयाच्वंगु समस्या, प्रधानमन्त्री रोजगार कार्यक्रमलिसे सम्बन्धित छुं न्ह्यसः व समस्या दुसा नं फोनपाखें सम्पर्क तयाः जानकारी कायेगु व गुनासो न्यंकेफइगु खँ नं धाःगु दु । कल सेन्टरय् नेपाःपाखें ११४१ वा १६६००१५०००५ य् निःशुल्क फोन यायेफइ । अथेहे सेन्टरया इमेल, फेसबुक, म्यासेन्जर, इमो, भाइवरपाखें नं निःशुल्क समस्या न्यंकेफइगु खँ नं धाःगु दु । सेन्टरया फाइबर नं. ९८०१८०००१३ खः । अथेहे विदेशपाखें ९७७१५९७०००७ य् नं फोन यानाः खँ ल्हायेफइ ।

सम्बन्धित बुखँ

LEAVE YOUR COMMENTS