ने. सं. ११४४ कौलाथ्व पारू - नःलास्वनेगु

बालेनयात न्हय्न्हुया दुने लिसः बीत स्पष्टीकरण

येँ (नेपालभाषा टाइम्स)- नेपाल नागरिक उड्डयन प्राधिकरणं येँ महानगरपालिकाया मेयर बालेन साहयात स्पष्टी– करण न्यंगु दु । विमानस्थलया निषेधित क्षेत्र दुने दयेकाच्वंगु भवनया ज्या दिकेत मनपां निर्देशन बिउगु खँयात कयाः प्राधिकरणं थ्व स्पष्टीकरण न्यंगु खः ।

येँया ९ वडाया जग्गाय् दयेकाच्वंगु कम्प्लेक्सया नक्सा पास मजूगु धासें बिहीवाः नगर प्रहरीं अन तयातःगु तारबार चीकाः भवन निर्माणया ज्या दिकेत निर्देशन बिउगु खः ।
प्राधिकरणं दयेकाच्वंगु छेँया ज्या दिके न्ह्यः छुं जानकारी मबिउगु व थ्व ज्या छाय् दिकेमाःगु धकाः न्यनाबलय् ‘अन हे वनाः बुझे याः हुँ’ धकाः लिसः बिउगु धासें प्राधिकरणं नेपाल नागरिक उड्डयन प्राधिकरण ऐनया दफा २५ (१) कथं छाय् सजाय मयायेगु धकाः मेयर साहयात स्पष्टीकरण न्यंगु खः ।

उड्डयन प्राधिकरणया महानिर्देशक प्रदीप अधिकारीं सही यानातःगु उगु स्पष्टीकरणय् मेयर साहयात लिखित लिसः बीगु लागिं न्हय्न्हुया ई बियातःगु दु । स्पष्टीकरण मबिल धाःसा कानुन कथं कारबाही यायेगु जुइ धकाः नं धाःगु दु । उगु ऐन कथं कारवाही जुल धाःसा मेयर साहयात ५० द्वः तक बं पुइके फइगु खँ धाःगु दु ।

प्राधिकरणं येँ मनपाया प्रहरी प्रमुख राजुनाथ पाण्डे व वडा नम्बर ९ या वडाध्यक्ष रामजी भण्डारीयात नं स्पष्टीकरण न्यंगु दु ।

थ्वहे झ्वलय् मेयर साहं भारतया न्हूगु फिल्म ‘आदिपुरुष’ य् सीतायात भारतया म्ह्याय्मचा धकाः धयातःगु संवादया आधारय् हे फिल्म क्यने बी मखु धकाः याःगु निर्णयया नं आलोचना जूगु दु । छगू काल्पनिक महाकाव्यया पात्रया जन्म गन जूगु धइगु खँय् मनपां सरकारी निर्णय यात धकाः थ्व आलोचना जूगु खः ।