नेपालय् साइबर आक्रमण तीव्र
सामाजिक सञ्जालपाखें प्रलोभन क्यनाः ठगे याइपिं अप्वल
येँ – साइबर सुरक्षाय् नेपाः कमजोर खनेदुगुलिं थौंकन्हय् नेपालय् साइबर आक्रमण तीव्र रुपं अप्वया च्वंगु खँ सीदुगु दु । विदेशी साइबर आक्रमणतय्सं विशेष यानाः सामान्य इन्टरनेट प्रयोगकर्तायात ठगे यायेगु ताः तयाः साइबर आक्रमण सुरु यानाच्वंगु खँ प्रहरीं धाःगु दु ।
इन्टरनेटपाखें जुइगु अपराध पनेगु नेपाःया क्षमता कमजोर जूगु कारणं थौंकन्हय् विदेशय् च्वंपिं साइबर अपराधीतय्सं नेपालय् याइगु साइबर अपराध न्हियान्हिथं अप्वया वनाच्वंगु धापू साइबर सेलया प्रहरी अधिकारीतय् दु । खास यानाः थौंकन्हय् फेसबुकपाखें याइगु साइबर अपराधं आपालं नेपाःमित ठगे जुइका च्वने मालाच्वंगु दु ।
थज्याःपिं ठगेतय्सं नेपाः हे वयाः वा विदेश च्वनाः नं ठगी ज्या न्ह्याकाच्वंगु दु । नेपालय् वइपिंसं नक्कली एटिएम कार्ड दयेकाः लुटे यानाच्वंगु दुसा विदेशय् च्वनाच्वंपिंसं सामाजिक सञ्जाल मार्फत ठगे यानाच्वंगु दु ।
इन्टरनेटपाखें ठगे याइपिं अज्याःपिं साइबर ठगतय्सं सुरुइ छिगु नामय् छगू बहुमूल्य उपहार छ्वया हयागु दु धकाः सन्देश छ्वया हइगु व लिपा उपहारया थ्व सामान भारतया भन्सारय् थानाच्वन, व लिकायेत ध्यबा भचा बिया हजि धकाः धमाधम ध्यबा झारे याकेगु यानाच्वंगु खँ धाःगु दु ।
विदेशी ठगतपाखें अन्तर्राष्ट्रिय स्तरया प्रविधि छ्यलाः आक्रमण, तर नेपाःया साइबर क्षमता धाःसा अन्तर्राष्ट्रिय स्तरया जुइ मफुनि
थःत छ्वया हःगु अज्याःगु पार्सल कायेगु लोभं द्वलंद्वः जक मखु लखौं ध्यबा छ्वयेधुंकाः जब सामान ल्हातय् लाइ मखु उबलय् जक थः ठगीया शिकार जुल धकाः सीकीगु खः । तर अबलय् तक ठगे याइपिं साइबर अपराधीतय्त ज्वनेगु स्थिति हे मदयेधुंकीगु खँ प्रहरीं धाःगु दु । नेपाल प्रहरीइ थौंकन्हय् अज्याःगु साइबर अपराधया आपालं उजुरी वयाच्वंगु दु ।
वंगु न्हय्दँया दुने नेपाल प्रहरीइ अज्याःगु ४४ गू मुद्दा दर्ता जूगु दुसा थज्याःगु ठगीइ ल्हाः दुगु द्वपनय् ६२ म्हेसित ज्वनेधुंकूगु खँ प्रहरी रेकर्डय् दु । ठगीया केश अप्वः वःगुलिं नेपाल प्रहरीं थौंकन्हय् थज्याःगु हे केश जक स्वयेगु निंतिं धकाः अलग हे सेल नं स्थापना यानातये धुंकूगु दु ।
साइबर अपराधीतय्सं बैंकिङ प्रणाली ह्याक यानाः, डाटा खुया कयाः नं नेपाःमितय् ध्यबा लुटे यानाच्वंगु खँ प्रहरीं धाःगु दु । विदेशपाखें जुइगु अज्याःगु साइबर अपराध बारे जानकारतय्सं धाः कथं विदेशीतय्सं थ्व ज्याया निंतिंं छ्यलीगु प्रविधि अन्तर्राष्ट्रिय स्तरया जुइ । तर उकियात पनेगु प्रक्रिया व नेपाली साइबर क्षमता धाःसा अन्तर्राष्ट्रिय स्तरया जुइ मफुनि ।
गुकिं यानाः थज्याःपिं साइबर अपराधीतय्सं नेपाःयात हे टार्गेट यानाः आक्रमण यायेगु सुरु यानाच्वंगु दु । थज्याःगु अपराध पनेगु खःसा नेपालं नं साइबर सुरक्षाया निंतिं क्षमता बिकास याये हथाय् जुइधुंकूगु खँ विज्ञतय्सं धाःगु दु ।
LEAVE YOUR COMMENTS