ज्या न्ह्याके न्ह्यः योजनाया जानकारी बियादिसँ

येँ – येँ महानगरपालिकाया प्रमुख विद्यासुन्दर शाक्यं महानगरयात योजना बुझे यानाः जक ज्या न्ह्याकेत इनाप यानादीगु दु । मनपा प्रमुख शाक्यं महानगर लागा दुनेया सतक म्हुइगु व ल्हाकेगु लगायत मेमेगु संरचनाया ज्या यायेबलय् महानगरयात योजना बुझे यानाः जक ज्या न्ह्याकेत इनाप यानादीगु खः ।

महानगर प्रमुख शाक्यं वंगु शुक्रवाः सरोकारवालालिसे जूगु सहलहया इलय् उगु खँ धयादीगु खः । वय्कलं सतक मर्मत, निर्माण, सतक म्हुइगु, ल्हाकेगु लगायत मेमेगु छुं नं योजनाया ज्या यायेबलय् गबलेनिसें न्ह्याकेगु व गबलय् तकया दुने क्वचायेकेगु उकिया जानकारी महानगरयात बीत सरोकारवालायात इनाप यानादीगु खः ।

लिसें वय्कलं अज्याःगु छुं नं ज्या यायेबलय् न्हिं ग्वःम्ह ज्यामि खटे जुइगु खः उकिया विवरण नं बुझे यायेत इनाप यानादिल । वय्कलं धयादिल, ‘आः महानगरया सतक सफा यायेत ब्रुमर वःगु दु, वइगु छुं दिंया दुने ब्रुमरपाखें महानगरया सतक सफा यायेगु ज्या न्ह्याइ, उकिं सतकय् अज्याःगु छुं नं ज्या याये न्ह्यः उकिया जानकारी बियादिसँ ।’

महानगर लागा दुनेया सतक म्हुइगु व ल्हाकेगु लगायत मेमेगु संरचनाया ज्या यायेबलय् महानगरयात योजना बुझे यानाः जक ज्या न्ह्याकेत इनाप यानादीगु दु ।

लाक्वपाक्व धंगं सतक म्हुइगु ज्यां महागनरवासीं सास्ति फयेमालाच्वंगु धासें वय्कलं धयादिल, ‘सुथय् पिहां वनेगु इलय् तक छुं मजूगु सतकय् सनिलय् लिहां वयेगु इलय् तकया दुने गाः खना तये धुंकी । सुनां वयाः गाः खनीगु खः ? छाय् गाः खनीगु खः ? छुं हे सी मखु । थ्व समस्याया समाधान मयासे महानगरपालिकां न्ह्याक्व हे ज्या याना क्यंसां उकिया लिच्वः क्यने फयाच्वनीमखु ।’

सहलहया इलय् येँ मनपाया प्रमुख प्रशासकीय अधिकृत यादव प्रसाद कोइरालां ज्या यायेबलय् नागरिक व मेपिं साझेदारीप्रति उत्तरदायी जुयाः यायेमाःगु आवश्यक जूगु खँ धयादिल ।

अथे हे येँ महानगरीय ट्राफिक प्रहरी महाशाखाया प्रमुख प्रहरी वरिष्ठ उपरीक्षक वसन्त पन्तं वा वइगु इलय् पुतलीसतक, जमः, भद्रकाली लगायत आपालं थासय् जलमग्न जुयाः सवारी साधन चले यायेत समस्या जुइगु नापं सवारी आवागमनय् तकं समस्या जुइगु जूगुलिं कमजोर पूर्वाधार सुधारय् ध्यान बीमाःगु खँय् ध्यानाकर्षण यानादिल ।