प्रहरीया प्रशिक्षण प्रणालीयात थप परिस्कृत याइगु

येँ – नेपाल प्रहरीया प्रशिक्षण प्रणालीयात थप परिस्कृति याना यंकीगु जूगु दु । प्रहरी महानिरीक्षक सर्वेन्द्र खनालं प्रहरी संगठनया निंतिं ईयात ल्वयेक दक्ष जनशक्ति उत्पादन यायेगु ल्याखं वइगु दिनय् प्रशिक्षण प्रणालीयात थप परिस्कृत याना यंकेगु खँ धयादीगु खः ।

राष्ट्रिय प्रहरी प्रशिक्षण प्रतिष्ठान महाराजगंजय् वंगु शुक्रवाःनिसें शुरु जूगु वार्षिक तालिम योजना निर्माण सम्बन्धय् मंगलवाः जूगु समापन ज्याझ्वलय् नवासें प्रहरी महानिरीक्षक खनालं उगु खँ धयादीगु खः । नेपाल प्रहरीया प्रशिक्षण प्रणालीइ सुधार हयेगु ल्याखं गोष्ठिया निष्कर्ष महत्वपूर्ण व फलदायी जुइगु विश्वास यासें वय्कलं उगु निष्कर्ष व योजनायात उच्च प्राथमिकता बियाः सान्दर्भिकताया आधारय् लागू याना यंकेगु जुइ धयादिल ।

उगु इलय् प्रतिष्ठानया कार्यकारी निर्देशक प्रहरी अतिरिक्त महानिरीक्षक धिरु बस्न्यातं गोष्ठिया सारसंक्षेप न्ह्यब्वयादिसें देय्या हिला वनाच्वंगु सुरक्षा संवेदनशीलतायात ध्यानय् तयाः आत्मबल युक्त, निर्भिक जुइ फइगु प्रशिक्षणनापं प्रहरी युक्ति व कारवाही तालिम संचालन यायेमाः धयादिल ।

प्रतिष्ठानया निर्देशक प्रहरी नायब महानिरीक्षक प्रद्युम्नकुमार कार्कीं लसकुस यासें गोष्ठिइ जूगु सहलह व निष्कर्षं वइगु दँया निंतिं उपलब्धिमूलक तालिम योजना निर्माण यायेत ग्वाहालि जुइगु विश्वास प्वंकादिल । प्यन्हुयंकं जूगु गोष्ठिइ तालिम प्रदायक संस्थाया निर्देशक, प्राचार्य, समादेशक, प्रहरी प्रधान ज्याकूया थीथी निर्देशनालय, महाशाखा, शाखाया प्रतिनिधितय् सहभागिता दुगु खः।