मेयर्स कप धिमय् कासा जुइगु

किलाघः सांस्कृतिक पुचःया ग्वसालय् येँ महानगरव्यापी न्हापांगु मेयर्स कप ट्रफि चिग्व धिमय् धेंधेंबल्लाः जुइगु जूगु दु ।
थ्व हे वइगु पोहेलागा द्वादशि (पुस २९ गते) कुन्हु जुइगु धेंधेंबल्लाखय् येँ महानगर दुनेया ख्वीनिगू ज्यापु त्वाः खलःपाखें मुक्कं नीगू पुचलं ब्वति काइगु ग्वसाः खलकं जानकारी बिउगु दु । कासाय् न्हाप, लिउ व लियांलिउ लाःगु पुचःयात नगद सिरपाः लिसें ट्रफि व पदकया नं व्यवस्था यानातःगु दु ।
थुगु ज्याझ्वःपाखें नेवाः समुदाय दुने चिग्वः धिमय् बाजंया संरक्षण व प्रवद्र्धन जुइगु विश्वास यानातःगु दु ।
ज्याझ्वलय् नेवाः ल्याय्म्हतय् प्रतिभा न्ह्यब्वयेकथं सांस्कृतिक ज्याझ्वः नापं नेवाः नसात्वँसाया नं स्टल दइगु ग्वसाः खलकं छगू पत्रकार सम्मेलनयासे जानकारी बिउगु दु ।