रुसय् ओमिक्रोन विरुद्धया खोप दयेकेगु शुरु

एजेन्सी- रुसं कोरोना भाइरसया न्हूगु भेरियन्ट ओमिक्रोन विरुद्धया खोप दयेकेगु शुरु याःगु दु । रुसया गामाले राष्ट्रिय अनुसन्धान केन्दं्र न्हूगु भेरियन्ट ओमिक्रोन विरुद्धया खोपया न्हूगु संस्करण दयेकेगु शुरु यानागु धाःगु दु । केन्द्रया अधिकारीतय्सं बिउगु जानकारीकथं रुसं दयेकूगु कोरोनाविरुद्धया खोप स्पुतनिक भीयात हे संशोधन यानाः न्हूगु खोप दयेकेगु ज्या जुइ ।

अधिकारीतय्सं याकनं हे खोपया विकास जुइगुु व ४५ न्हुया दुने आम नागरिकयात उपलब्ध जुइगु नं धाःगु दु । अन्तर्राष्ट्रिय बजारय् नं खोप थ्यंकेगु अधिकारीतय्सं धाःगु दु ।

विश्व स्वास्थ्य संगठनं ओमिक्रोन विश्वन्यंक न्यना वनेफइगु धकाः धयाच्वंगु इलय् रुसं खोप दयेकेगु शुरु यानागु धाःगु खः । संगठनं कोरोनाया न्हूगु भेरियन्टं यानाः विश्वय् महामारी ताःहाक जुइफु धाःगु खः । संगठनं खोप कायेत, मास्क तयाजुइत व भौतिक दूरी कायम यायेत इनाप नं याःगु खः ।

थ्व हे भाइरसया विषययात कयाः अमेरिकाया राष्ट्रपति जो बाइडेनं न्हूगु भेरियन्ट चिन्ताया विषय जूसां ग्याय् माःगु मदु धाःगु दु । बाइडेनं आः थथें लकडाउनया आवश्यक मदुगु, बरु खोप माकानिपिंत खोप कायेत व कायेधुंकूपिंत बुस्टर डोज कायेत इनाप याःगु दु । अमेरिकाय् आःतक थ्व भेरियन्ट खनेदुगु मदुनि ।