नेपालभाषाया माध्यमं हे पत्रकारिता यायेमाः ः रोहित

ख्वप – नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं नेपालभाषाया माध्यमं हे पत्रकारिता यायेत बः बियादीगु दु । स्वीच्याक्वःगु नेपालभाषा साहित्य तःमुँज्याय् उत्कृष्ट साहित्यिक स्रष्टातय्त सिरपाः लःल्हानादिसें वय्कलं नेपालभाषा स्यलाक्क ल्हाये मसःगु व ब्वने मसःगु कारण न्हियान्हिथं ब्वनेगु व च्वयेगु अभ्यास मदुगुलिं खः धयादिसें यदि नेपालभाषां ब्वनेगु न्हिपौ, वाःपौ नापं भाषिक पत्रकारितायात च्वन्ह्याके फत धाःसा नेपालभाषा विकास जुइ धयादिल ।

ख्वपय् छगू नेपालभाषाया माध्यमं पत्रकारिता याइगु प्रकाशन गृह दयेमाःगु खँय् बः बियादिसें वय्कलं जनताया भावना मथुइक च्वइम्ह च्वमि कदापि जनताया लेखक वा साहित्यकार जुइ फइमखु धयादिल । तःमुँज्याय् निन्हुयंकं जूगु साहित्यिक ज्याझ्वलय् ‘आत्मसमर्पण’ नांगु एल. के. सुन्दरया बाखं न्हाप व ‘विश्वास’ नांगु सक्वःया श्रीभक्त जोशीया बाखं लिउ लाःगु खः ।

अथेहे चिनाखं विधाय् ‘समृद्धिया हाकुबञ्जात’ नांगु केशव तमखूया चिनाखँ न्हाप, ‘द्यवं द्यः पितिनि’ नांगु बलम्बुया शिवप्रसाद श्रेष्ठया चिनाखँ लिउ व ‘जिगु हिं च्वःगु देय्या बाखं’ नांगु चिनाखँया च्वमि मदन श्रेष्ठ लियांलिउ लाःगु खः ।

३ नं प्रदेशया सांसद सृजना सैंजूया सभापतित्वय् जूगु सातिकुन्हुया साहित्यिक ज्याझ्वलय् मूपाहां नारायणमान बिजुक्छेँ रोहितं स्थानीय वाद्यगुरु मीनबहादुर सुवाल व पुनवीर गैडा नापं ताः ईनिसें थाय्थासय् घः कुबियाः जनतायात लः त्वंकाः सेवा याना वयाच्वनादीम्ह लतंभक्त प्रजापतियात नं हनापौ लःल्हासें दोसल्लां न्ययेका हनेज्या यानादिल ।

निन्हु कुन्हुया ज्याझ्वलय् नेमकिपाया केन्द्रीय सचिव व सांसद प्रेम सुवाल, वरिष्ठ पत्रकार भैरव रिसाल, पुलांम्ह महान्यायधिवक्ता लक्ष्मीबहादुर निराला, लेखक व चिकित्सक डा. सरोज धिताल, त्रिभुवन विश्वविद्यालय नेपालभाषा विभागया प्रमुख ओमकारेश्वर श्रेष्ठ, नेपाल प्रज्ञा प्रतिष्ठानया पुलांम्ह प्राज्ञ सुलोचना मानन्धर, भक्तपुर क्यान्सर अस्पतालया चिकित्सक डा. आरती शाह, च्वमि शिशिर वैद्य, सिन्धुपाल्चोक जिल्लाया पुलांम्ह सांसद कृष्णराज श्रेष्ठ, सिन्धु नेवाः खलःया नायः माधवलाल कर्माचार्य, प्रा. सर्वज्ञभक्त मल्ल, इतिहासकार प्रा. डा पुरुषोत्तमलोचन श्रेष्ठ, इतिहासकार योगेन्द्रमान श्रेष्ठ, नेपाली लोकम्येँय् पीएचडी यानादीम्ह अमेरिकी नागरिक डा. आना स्टिर, साहित्यकार दिल्लीराज जोशी, पूर्व वैद्य, सीता सुवेदी, दामोदर सुवाल, टेकबहादुर राना, ख्वप नगरपालिकाया उपप्रमुख रजनी जोशी, ख्वप कलेज अफ इन्जिनियरया प्राचार्य ई. सुनिल दुवाल, ख्वप इन्जिनियर कलेजया प्राचार्य सुजन माकः, ग्वसाः खलःया न्वकू कृष्णबहादुर प्रजापतिपिंसं नं न्ववानादीगु खः ।

निन्हुयंकं जूगु नेपालभाषा साहित्य तःमुँज्याय् निन्हुयंकं हे हुलाप्याखं, ख्यालः व छधाःप्याखं सहितया थीथी सांस्कृतिक ब्वज्या नं जूगु खः ।

सम्बन्धित बुखँ

LEAVE YOUR COMMENTS