कोरोनां पना बिल वामदेवया मुद्दा

मुद्दाया फैसला मवयाः मन्त्रिमण्डल पुनर्गठन पनाच्वन

येँ (नेपालभाषा टाइम्स) – प्रधानन्यायाधीश लिसे सर्वोच्च अदालतया न्यायाधीशपिं कोरोना संक्रमणया कारणं आइसोलेसनय् च्वने माःगुलिं नेकपा नेता वामदेव गौतमया राष्ट्रिय सभाय् मनोनयन सम्बन्धी मुद्दा थाति लाःगु दुसा वय्कःया थ्व मुद्दा थाति लानाः उखे मन्त्रिमण्डल पुनर्गठन यायेगु ज्या समेत प्रभावित जूवंगु दु ।

सर्वोच्च अदालतया प्रधानन्यायाधीश चोलेन्द्र शमशेर जबरा वंगु छुं न्हि न्ह्यवंनिसें आइसोलेशनय् च्वनादीगु खःसा वय्कःयां लिपा मेम्ह न्यायाधीश पुरुषोत्तम भण्डारी नं म्हिगः कोरोना संक्रमणं यानाः आइसोलेशनय् च्वनेमाःगु जुइवं गौतम विरुद्ध लानाच्वंगु रिट निवेदनया सुनुवाई प्रभावित जूगु खः ।

वंगु शुक्रवाः गौतम पक्षया वकिलत यक्व दुगुलिं सुनुवाई क्वमचाःगु खःसा थुकिं यानाः वय्कःया मुद्दायात  ‘निरन्तर स्वयेगु’ ली तया बिउगु खः । थ्व मुद्दाय् म्हिगः बुधवाः सुनुवाई जुइ धाःगु खःसा न्यायाधीत हे आइसोलेशनय् च्वनेमाःगुलिं म्हिगः नं सुनुवाई जुइ मफुगु खः ।  वरिष्ठ अधिवक्ता दिनेश त्रिपाठी व अधिवक्ता बद्रीराज भट्टं राष्ट्रिय सभाय् गौतमया नियुक्ति पाय्छि मजू धासें उकियात बदर यायेमाःगु माग सहित वंगु असोज ५ गते रिट दायर याःगु खः ।

रिटया प्रारम्भिक सुनुवाइ लिपा न्यायाधीश आनन्दमोहन भट्टराईया एकल इजलासं गौतमयात थप संवैधानिक नियुक्ति बीमते धासें संवैधानिक इजलासय् सुनुवाई यायेत आदेश बिउगु खः । आः मुद्दा स्वयेमाःपिं न्यायाधीशत हे आइसोलेशनय् च्वनाच्वंगुलिं कंस शुक्रवाः नं गौतमया मुद्दाय् सुनुवाई जुइगु सम्भावना मदुगु खँ धाःगु दु। थुकिं यानाः आः मोहनि लिपा हे जक वय्कःया मुद्दाय् सुनुवाइ जुइ फइगु खँ अदालत सूत्रं धाःगु दु ।

मेखे गौतमया मुद्दा टुंगो मजुयाः मन्त्रिमण्डल पुनर्गठन यायेगु ज्या समेत प्रभावित जूगु खँ धाःगु दु। आः जुइगु मन्त्रिमण्डलय् गौतमयात नं दुथ्याकेगु तयारी जुयाच्वंगु खःसा अदालतया मुद्दां उकियात नं पना बिउगु दु। यदि गौतमया मनोनयनयात कयाः न्ह्यसः पिहां वल धाःसा मेम्ह नेता नारायणकाजी श्रेष्ठया मनोनयन समेत विवादय् लाये फइगु जूगुलिं नेकपाया नेतृत्व गौतमया मुद्दायात पियाच्वंगु खँ धाःगु दु ।

सम्बन्धित बुखँ

LEAVE YOUR COMMENTS