बोडेया नीलबाराही प्याखं क्वचाल

थिमि – मध्यपुर थिमिस्थित बोडेया ऐतिहासिक नीलबाराही प्याखं क्वचाःगु दु । सापारुया कन्हय्कुन्हुनिसें प्यचा–प्यन्हुतक क्यनीगु नीलबाराही प्याखं वंगु शुक्रवाः क्वचाःगु खः ।

बोडेया थीथी सांस्कृतिक प्याखंमध्ये थ्व छगू अतिकं महत्वं जाःगु प्याखं खः । ख्वप देय्या धार्मिक व सांस्कृतिक महत्वं जाःगु बिस्काः व थ्व झ्वलय् बोडेय् जुइगु म्येप्वाः खनेगु जात्रा लिपा नीलबाराही प्याखंयात दकलय् तःधंगु महत्व बियातःगु दु ।

नीलबाराही, भैरव, कुमारि, सिंह, द्वारपाल, क्षेत्रपाल, गणेद्यः सहित झिंगुम्हेसिया नीलबाराही गंप्याखं बोडेया मूध्वाखां पित हयेधुंकाः थीथी त्वालय् च्वंगु देगः व द्यः चाःःहिलाः प्याखंक्यनेगु याइ ।

थ्व प्याखनय् देवगण जुइपिंसं प्याखंज्वःछि सुयातं न्वतुइ मजिउ, छुं नये मजिउगु व गनं नं फ्यतुइ मजिउ । द्यःगंछिं प्याखं हुलाच्वनीगु इलय् हे छेँखाछेँखापतिकं पुजा बीगु ज्या नं न्ह्यानाच्वनी ।

गंप्याखनय् थीथी बाजं थाइगु खःसां मू बाजंकथं क्वताः बाजंयात कयातःगु दु । थ्व बाजं मेमेगु बाजं स्वयां बिस्कं जक मखु, थ्व बाजं जात्रा न्ह्यायेधुनेवं क्वमचाःतले दिके नं मजिउ । मल्लकालीन इलय् भूतप्रेत, पिशाच, दानव आदिं दुःख बिउगु जूगुलिं इमिगु कष्टपाखें मुक्त जुइत थ्व प्याखं पिथंगु धइगु स्थानीयवासीतय् धापू दु ।