मैत्रेय युवा संघया २६ क्वःगु दँमुँज्या
ख्वप(नेपालभाषा टाइम्स)÷ बुद्ध जन्मस्थल लुम्बिनीइ छुं ई न्ह्यः भारतया धार्मिक गुरु मोरारी बापूपाखें जूगु रामकथा वाचन ज्याझ्वः धार्मिक अतिक्रमण जूगु थन जूगु छगू ज्याझ्वलय् नवानादीपिं वक्तातय्सं धाःगु दु । मैत्रेय युवा संघया २६ क्वःगु वार्षिकोत्सवलिसें दँमुँज्या ज्याझ्वलय् नवानादीपिं वक्तापिंसं बुद्ध जन्मस्थल थेंज्याःगु पवित्र थासय् जूगु उकथंया ज्याझ्वःयात धार्मिक अतिक्रमणया संज्ञा बिसे लुम्बिनी विकास कोषं नं अज्याःगु ज्याझ्वः याके बी मजिउगु वक्तातय्सं धाःगु दु ।
जयकीर्ति विहार थथुबहिलिइ जूगु संघया वार्षिकोत्सव ज्याझ्वलय् नवानादीपिं पाहांपिंसं अन्तर्राष्ट्रिय बौद्ध तीर्थस्थल जूगुलिं न्ह्यागु जाति व समुदायं दर्शन व भ्रमण याये जिउगु तर बुद्ध धर्म बाहेक मेमेगु गुगुं नं धर्मया प्रचार जुइकथंया ज्याझ्वः याये मजिउगु नं इमिसं धाःगु दु ।
ज्याझ्वलय् पाहांकथं झायादीपिं धर्मोदय सभाया उपाध्यक्षलिसें पुलांम्ह मन्त्री डा. केशवमान शाक्य, धर्मोदयया महासचिव सागरमान वज्राचार्य, बौद्ध संघ ख्वपया नायः त्रिरत्न शाक्य लगायतया वक्तापिंसं बुद्ध जन्मस्थल थेंज्याःगु थासय् मेमेगु धर्मया प्रचार जुइगु ज्याझ्वः यायेगु व याकेगु खँय् सकल बौद्धजनलिसें नेपाल सरकार नं सचेत जुइमाः धयादीगु दु ।
पंचशील ग्रहण यासें न्ह्याःगु संघया वार्षिकोत्सव ज्याझ्वः मुनि विहारया भिक्षु अर्जुनया प्रमुख आतिथ्यताय् जूगु खः । संघया नवनिर्वाचित नायः तीर्थराज वज्राचार्यं लसकुस यानादीगु ज्याझ्वलय् सहसचिव मेघना श्रेष्ठं वार्षिक प्रतिवेदन व सचिव संचित बुद्धाचार्यं आर्थिक प्रतिवेदन न्ह्यब्वयादीगु खः ।
संघया न्हूगु ज्यासना पुचः नं ल्यःगु खः सा न्हूगु ज्यासना पुचलय् नायः तीर्थराज वज्राचार्य, सचिव संचित बुद्धाचार्य, सहसचिव मेघना श्रेष्ठ, कोषाध्यक्ष प्रमिला धुख्वा व दुजलय् माइला दोङ्ग, सपूत तामाङ्ग, गंगा गोसाई, अमीर वज्राचार्य व सिजन शाक्य निर्वाचित जुयादीपिं खःसा वय्कःपिंत मूपाहांपाखें खादा क्वाखायेकादीगु खः ।
ज्याझ्वलय् संघया निवर्तमान नायः लक्ष्मीचन्द्र वज्राचार्यं सुभाय् देछानादीगु खः ।
LEAVE YOUR COMMENTS