भूमिगत विद्युत प्रणाली

विद्युतीय दुर्घटनाया जोखिम म्हो यासे सहरया सौन्दर्य अप्वयेकेगु लक्ष्यलिसें नेपाल विद्युत प्राधिकरणं स्वनिगः दुनेया प्रशारण प्रणालीयात भूमिगत याइगु जूगु दु । प्राधिकरणं न्हापांगु चरणय् येँया महाराजगंज व रत्नपार्क वितरण केन्द्र अन्तर्गतया लागाय् मत तारयात भूमिगत व वितरण प्रणाली स्वचालित यायेत निर्माण व्यवसायी छनोट याःगु दु ।

उगु वितरण केन्द्र अन्तर्गतया मतया तारयात भूमिगत यायेत दकलय् म्हो ध्यबा बोलकबोल याःगु भारतीय कम्पनी केइआइ इन्डष्ट्रिज लिमिटेड छनोट जूगु दु । प्राधिकरणं थ्व हे फागुन ६ गते बोलपत्रया लिच्वः सार्वजनिक यासें छनोट जूगु कम्पनीयात कार्य सम्पादन जमानतसहित खरिद सम्झौताया निंतिं वयेत पत्राचार याःगु दु ।

कम्पनीं सूचना जारी जूगु २८ न्हुया दुने कार्यसम्पादन जमानतसहित ठेक्का सम्झौताया निंतिं वयेमाःगु व्यवस्था याःगु दु । संसारन्यंकभनं हे सहरी लागाय् विद्युतीय वितरण व प्रशारण प्रणाली भूमिगत यानातःगु दु । सहरया थःगु हे सौन्दर्य दइ । न्ह्याथाय् स्वःसां मत व टेलिफोनया तारया कारणं सहर कुरुप जुयाच्वंगु जक मखु, दुर्घटनाया जोखिम नं उत्तिकं अप्वया वनाच्वंगुलिं प्रशारण व वितरण प्रणाली भूमिगत यायेत्यनागु प्राधिकरणया धापू दु ।

कम्पनीलिसें महाराजगंज वितरण केन्द्र अन्तर्गतया ज्याया निंतिं करिब स्वंगू अर्ब ६० गू करोडय् ठेक्का सम्झौता जुइ । कम्पनीं रत्नपार्क वितरण केन्द्र अन्तर्गतया ज्याया निंतिं करिब स्वंगू अर्ब १२ गू करोड १५ गू लाखय् ज्या सम्पन्न याइ । मध्य व उत्तर येँ (महाराजगंज)या आयोजना प्रमुख अभिषेक अधिकारीयाकथं कम्पनीं कार्यसम्पादन जमानत हयेधुंकाः ठेक्का सम्झौता जुइ ।

ठेक्का सम्झौताया दक्वं प्रक्रिया आः वइगु जेठनिसें ज्या यायेगु लक्ष्य क्वःछिनातयागु अधिकारीं जानकारी बियादिल । वय्कःया कथं कम्पनीं ठेक्का कार्यान्वयनय् वःगु निदँत्या (३० महिना)या दुने ज्या सिधयेकेमाःगु जुइ । प्राधिकरणं थ्व स्वयां न्ह्यः अनुमानित लागत स्वयां थिकेगु दर वयेवं पुलांगु ठेक्कायात रद्द यानाः न्हूगु प्रक्रिया शुरु याःगु खः ।

न्हापांगु चरणय् येँया पूर्व व दक्षिणय् लाःगु बागबजाः, असं, दरवारमार्ग लगायत रत्नपार्क वितरण केन्द्रं कःघानाच्वंगु लागा व मध्य व उत्तरया बालुवाटार, ग्वंगःबुँ, सामाखुसि लगायत महाराजगंज वितरण केन्द्र अन्तर्गतया लागाय् लाःगु विद्युत वितरण प्रणालीयात भूमिगत व स्वचालित यायेत्यनागु प्राधिरणं न्ह्यथंगु दु ।

ठेकेदार कम्पनीं भूमिगत वितरण प्रणालीया डिजाइन, सामान आपूर्ति, जडान व संचालन यायेमाःगु जुइ । न्हापांगु चरणय् महाराजगंज व रत्नपार्क वितरण केन्द्रया मुख्य सतकय् ११ केभी व ४०० भोल्टया प्रणालीयात भूमिगत व स्वचालित ‘अटोमेसन’ याइगु जूगु दु । प्रशारण लाइन भूमिगत यायेगुया नापनापं उगु वितरण केन्द्र अन्तर्गतया करिब ग्वीद्वः ग्राहकया छेँय् स्मार्ट मिटर जडान याइ ।

स्मार्ट मिटर जडान जुइधुंकाः मिटर रिडर तकं म्वाःलीगु व ग्राहकं छु गुलि मात्राय् विद्युत प्रयोग यायेगु खः थम्हं हे क्वःछी फइगु जुइ ।
वितरण प्रणालीयात भूमिगत यायेगुयालिसें अप्टिकल फाइबर लायेगु व मतया वितरण तथ्यांक तयेत बिस्कं केन्द्रया स्थापना जुइ । उगु हे केन्द्रं ग्राहकया सकतां गतिविधिया बारे जानकारी नं तइ ।

निगूगु चरणय् मेमेगु महानगरपालिका व उपमहानगरपालिकाय् तकं भूमिगत लाइन विस्तार यायेगु ज्या जुइ । अज्याःगु विद्युत प्रणालीया आधुनिकीकरण व स्मार्ट मिटर जडान यायेगु योजनातकं प्राधिकरणया दु ।

सतक म्हुइबलय् सर्वसाधारणयात आपालं सास्ती फयाच्वने म्वाःलेमा धइगु ल्याखं ‘होराइजेन्टन डाइरेक्सनल ड्रिलिङ’ प्रविधि नालीगु जूगु दु । थ्व प्रविधि नालीबलय् छुं मिटर तापाक दूरीइ निगू गाः खनाः दथुइ भूमिगत तरिकां हे तारसहितया पाइप तया यंके फइगु प्राधिकरणया धापू दु ।

 

सम्बन्धित बुखँ

LEAVE YOUR COMMENTS