ख्वपय् नं खने दत डेंगुया विरामी

ख्वप – देयन्यंकं न्यना वनाच्वंगु डेंगुया लिच्वः ख्वपय् नं न्यनावंगु दु । जिल्ला स्वास्थ्य कार्यालयया स्वास्थ्य अधिकृत पार्थमणि न्यौपानें थगुने स्वयां थुगुसी प्यदुगं डेंगुया विरामी लूगुलिं डेंगुया उच्च जोखिम दुगु खँ कनादिल ।

ख्वप अस्पतालय् ज्या यानाच्वंम्ह छम्ह कर्मचारी सहित आः तक झिंनिम्हेसित डेंगुया संक्रमण जुइधुंकूगु दु । आः निम्हेसित अन हे व मेपिंत टेक अस्पतालय् वासः याकाच्वंगु खँ अस्पतालया मेडिकल सुपरिटेन्डेन्ट डा. रविभूषण सुवालं कनादिल । ख्वप अस्पतालय् डेंगु संक्रमण परीक्षण कीट्या व्यवस्था मदयाः टेकु अस्पतालय् जाँचे याकेत छ्वयेमाःगु खँ नं वय्कलं कनादीगु दु ।

जिल्ला स्वास्थ्य कार्यालयया अधिकृत न्यौपानेया कथं थगुेन जिल्लाय् स्वम्हेसिके जक डेंगु खनेदुगु खः । थुगुसी डेंगुया संक्रमण अप्वयेवं फुक्कं स्वास्थ्य चौकी, नगर जनस्वास्थ्य चौकी व सञ्चार माध्यमपाखें गांगामय् थुकिया बारे जनचेतना न्यंकेगु अभियान न्ह्याकूगु दु ।

थ्वहे झ्वलय् येँ महानगरपालिका पाखे नं थीथी वडाय् डेंगु ल्वय् न्यना वनाच्वंगु धासें म्हिगःनिसें महानगरवासीयात सचेत यासें माइकिङ यायेगु ज्या न्ह्याकूगु दु । माइकिङ यायेगु झ्वलय् डेंगु ल्वय् न्यंकीपिं पत्तिपाखें बचे जुइत छेँया जःखः लः मुंके मबीगु, लः मुनिगु गाः ल्हाका छ्वयेगु, छेँया जःखः झाः मतयेगु फोहोर मयायेगु व इन्सेक्टिसाइट ह्वलाः डेंगुपाखें बचे जुइगु ज्या यायेत सर्वसाधारणयात इनाप यानातःगु दु ।