ज्ञानमाला भजनया विकास व विस्तार बारे सहलह

यल – नेपाल राष्ट्रिय ज्ञानमाला समिति ललितपुर क्षेत्रीय उपसमितिया ग्वसालय् ज्ञानमाला भजनया विकास व विस्तार बारे सहलह ज्याझ्वः जुल । उगु ज्याझ्वः यलया सुमंगल विहारय् जूगु खः ।भिक्षु पञ्ञासारपाखें पंचशील ग्रहण यासें न्ह्याःगु ज्याझ्वलय् समितिया मूछ्यांजे इन्द्रमुनि शाक्यं ज्याझ्वःया विषययात कयाः सहलह ज्याझ्वः न्ह्याकादीगु खःसा यल ज्ञानमाला समितिया नायः दबलबहादुर शाक्यं ज्ञानमाला भजनया विकासया निंतिं बिया वयाच्वनादीगु प्रशिक्षण्यात कयाः नुगःखँ तयादीगु खः ।

ज्याझ्वलय् मूपाहांकथं झायादीम्ह समितिया केन्द्रीय नायः रमना श्रेष्ठं ज्याझ्वलय् न्ह्यब्वःगु एकल सःया ज्ञानमाला भजनयात कयाः च्वछायादीगु खः । लिसें वय्कलं सः बांलाकेया निंतिं नियमित रुपं अभ्यास यानाच्वनेमाःगु खँय् बः बियादिसें ज्ञानमाला भजनपाखें भगवान बुद्धया शिक्षा प्रचार प्रसार याना वनेमाः धयादिल ।

ज्याझ्वलय् बौद्ध विद्वान् प्रा. डा. बज्रराज शाक्य, भजन शिरोमणि किरण शाक्य, यल ज्ञानमाला समितिया नायः शाक्य, समितिया केन्द्रीय छ्यांजे शाक्ययात सल्लाहकारय् मनोनयन यानागु जानकारी बिसें वय्कःपिं सकसितं सम्मान नं याःगु खः ।

ललितपुर क्षेत्रीय उपसमितिया संयोजक लक्ष्मीबहादुर महर्जनया सभापतित्वय् जूगु ज्याझ्वलय् उपसमितिया छ्यांजे भिमवज्र वज्राचार्यं उपसमितिया बारे जानकारी बियादीगु खःसा उपसमितिया लिउदांभरिं काजीरत्न शाक्यं सुभाय् देछानादीगु खः । ज्याझ्वलय् यलया थीथी झिंन्हय्गू ज्ञानमाला भजन संघपाखें एकल ज्ञानमाला भजन नं न्ह्यब्वःगु खः ।