सरस्वती प्रधानयात सर्वोच्चपाखें सफाइ

येँ (नेपालभाषा टाइम्स)- क्वथा बालं मबिउ धइगु द्वपं बियाः रुपा सुनार नांयाःम्ह मिसां तःगु उजुरीया आधारय् प्रहरी हिरासतय् लाःम्ह मय्जु सरस्वती प्रधानया मुद्दा सर्वोच्च अदातलं खारेज याना बिउगु दु ।

सुनारं क्वथा बालं मबिउम्ह प्रधानं जातीय भेदभाव याःगु द्वपं बिउगु खःसा वय्कःयात त्वःतकेगु ज्याय् राज्य सत्ताया दुरुपयोग याःगु धासें तत्कालीन मन्त्री कृष्णगोपाल श्रेष्ठयात समेत कारवाही यायेमाः धकाः अदालतय् रिट दायर याःगु खः । तर म्हिगः सर्वोच्च अदालतं थ्व रिटय् कारवाही यायेम्वाः धासें रिट हे खारेज याना बिउगु खः । थ्व रिटय् प्रधानया पक्षं अधिवक्तापिं जुजुकाजी महर्जन, नरेश श्रेष्ठ, राजु शाक्य व आशिष वैद्यपिंसं वहस यानादीगु खः ।

रुपा सुनारं क्वथा बालं मबिउगु खँयात त्वहः दयेकाः सरस्वती प्रधान विरुद्ध प्रहरीइ उजुरी तयाः प्रधानयात ज्वंकेगु ज्या याःगु खःसा उकिया विरुद्ध नेवाः अभियन्तातय्सं सतकय् वयाः प्रतिरोध यायेगु लिसें सरस्वती प्रधान निर्दोष खः धकाः सः थ्वयेकूगु खः ।