इतुम्बहालय् चायेकल न्हूकथंया म्युजियम
येँ (नेपालभाषा टाइम्स)- थनया नांजाःगु भाष्करदेव संंस्कारित केशचन्द्रवृmत पारावत् महाविहार इतुम्बहाः दुने म्युजियम पलिस्था याःगु दु । बहाः जीर्णोद्धार याःबलय् लुया वःगु थीथी ज्वलंयात हे बांलाकाः अन ब्वयेगु ल्याखं उगु म्युजियम पलिस्था याःगु खः ।
शनिवाः इतुम्बहालय् हे छगू ज्याझ्वःया दथुइ म्युजियमया उलेज्या यायेगु ज्या जूगु खः । लुम्बिनी बौद्ध विश्वविद्यालयया उपकुलपति प्रा.डा. नरेशमान वज्राचार्यं सप्तविधानुत्तर पूजा यानाः म्युजियम नीस्वनादीगु खः । वयां लिपा प्रा.डा. वज्राचार्य लिसें ज्याझ्वःया मूपाहां बागमती प्रदेशया सांसद शैलेन्द्रमान वज्राचार्य, येँ मनपाया पुलांम्ह मेयर विद्यासुन्दर शाक्य व विहारया मू थाय्पा मणिरत्न शाक्यपिंसं मंकाः कथं म्युजियमया उलेज्या यानादीगु खः ।
उलेज्या न्ह्यः इतुम्बहालय् छगू सभा नं जूगु खः । सभाय् न्ववासें मूपाहां वज्राचार्यं नेपालय् राज्यसत्तापाखें बौद्ध बहाःबहिली आक्रमण यायेगु, अन च्वंगु ज्वलं लुटे यायेगु व सफूत च्याका बीगु घटनात जूगु इतिहास दुगु जुयाः थुकथंया म्युजियम दयेकाः हलंज्वलंया सुरक्षा याःगु बांलाःगु ज्या खः धयादिल । वय्कलं बहाःबही धइगु शिक्षा बीगु थाय् जूगु कारणं आः म्युजियमयात नं शिक्षा बीगु थाय् कथं छ्यला यंकेमाःगु खँ नं कनादिल ।
प्रा.डा. नरेशमान वज्राचार्यं नेवाःतय् दथुइ म्युजियम पलिस्था यायेगु परम्परा न्हापांनिसें हे दु धासें बहिद्यः ब्वयेगु, तिसा ब्वयेगु धइगु न्हापाया म्युजियम थेंज्याःगु हे चलन खः धयादिल । थज्याःगु बांलाःगु ज्यायात सुनानं विरोध याः वल धाःसा उकिया प्रतिकार यायेमाःगु बिचाः नं वय्कलं तयादिल ।
अथे हे संरक्षण समितिया नायः प्रज्ञारत्न शाक्यं बहाः जीर्णोद्धार याःबलय् लुया वःगु ज्वलंतय्त सुरक्षित याना तयेगु लागिं हे म्युजियमया अवधारणा वःगु खः धयादिल । वय्कलं धयादिल, ‘थ्व आः वःगु बिचार मखु । थनिं नीदँ न्ह्यः हे थुकिया अवधारणा वयेधुंकूगु खः । तर दयेकेगु ज्या धाःसा निदँ न्ह्यवंनिसें तिनि न्ह्यात । थुकिं यानाः झीगु सम्पदाया सुरक्षा व अभिलेखीकरण यायेगु ज्या समेत जूगु दु ।’
अथे हे येँ मनपाया पुलांम्ह मेयर विद्यासुन्दर शाक्यं थ्व म्युजियम दयेकेगु लागिं थः मेयर जुयाच्वनागु इलय् छगू करोड तका दांया बजेट तयागु जानकारी नं बियादिल । विहार जीर्णोद्धार याइबलय् लुया वइगु ज्वलंत वांछ्वया तयेगु चलन नं झीथाय् दु धासें थन धाःसा उकियात म्युजियम दयेकाः संरक्षण यायेत्यंगु च्वछायेबहःगु ज्या खः धयादिल ।
विहारया दुजः भगवान शाक्यं न्ह्याकादीगु उगु ज्याझ्वलय् रमेशमान शाक्यं लसकुस यानादीगु खःसा ज्याझ्वः न्ह्यः धाः थानाः न्ह्यब्वयेगु ज्या नं जूगु खः ।
विहार जीर्णोद्धार याःबलय् अन न्यासःगू स्वयां अप्वः ज्वलं लुया वःगु खःसां म्युजियमय् धाःसा सच्छिगू जक ज्वलं ब्वयातःगु दु । थन विहारय् नियमित रुपं छ्यलेमाःगु छुं नं ज्वलं मतयागु खँ थुकिया व्यवस्थापन यानादीम्ह स्वस्ति राजभण्डारीं कनादिल । थन विहारय् लुयावःगु चिचीग्वःगु चीभाः, देवा, मुखः, सिँयापिं द्यःत आदि ब्वयातःगु दु । थुकियात नेपाःया हे न्हापांगु विहार म्युजियम खः धाःगु दु ।
LEAVE YOUR COMMENTS