हनुमानध्वाखाया ल्वहंपौ तोडफोड

येँ -अज्ञात मनूतय्सं हनुमानध्वाखा लागाय् च्वंगु मल्लकालीन ल्वहंपौ तछ्याना बिउगु दु । बिहीवाः कृष्ण देगः पिने तयातःगु प्रताप मल्लकालीन ल्वहंपौ तछ्यानातःगु खँ हनुमानध्वाखा हेरचाह अड्डाया प्रमुख सन्दीप खनालं कनादिल । उगु ल्वहंपौ जुजु प्रताप मल्लया ई वि.सं. १७०५ पाखेया खः ।

ल्वहंपौ तछ्याःगु जानकारी वयेवं कुचा जूगु ल्वहंया कुचात मुनाः हेरचाह अड्डाय् सुरक्षित याये हःगु दु । ल्वहंपौ तछ्याःगु बारे महानगरीय प्रहरी वृत्त हनुमानध्वाखा व पुरातत्व विभागयात जानकारी बीधुंकूगु दुसा ल्वहंपौया कुचा हाकनं स्वायेगु नितिं विज्ञपिंलिसे सहलह जुयाच्वंगु खँ धाःगु दु ।