पशुपतिइ नेवाः चीकेगु मेगु कुतः

थीथी देगलय् द्यः पाःलाः जुयाच्वंपिं कपालीत पितिन

येँ – पशुपतिं नेवाःतय्त विस्थापित याना छ्वयेगु झ्वलय् अनया थीथी द्यःयाथाय् परम्परांनिसें पाः च्वनावःपिं नेवाः पाःलाःतय्त नं थना छ्वयेगु शुरु याना हःगु दु ।
थ्व झ्वलय् अन हे च्वंपिं स्थानीय कपालीतय्त पशुपति लागा दुने च्वंगु थीथी देगलं पितिना हःगु खँ सीदुगु दु । अनया हनुमानद्यःयाथाय् पाःलाः च्वनीम्ह स्थानीय शिव कपालीयात म्हीग पशुपति विकास कोषया पदाधिकारीतय्सं लछारपछार यानाः द्यःया थासं पितिना हःगु खः ।

कपालीयात कोषया सहायक निर्देशक प्रेमहरि ढुंगानां ल्हाः ज्वनाः सात्तुसालाः पितिना छ्वःगु खँ धाःगु दु । पशुपति विकास क्षेत्र दुने लाःगु थ्व देगलय् कपालीत पाःलाः च्वने दइ मखु धासें वय्कःयात अनं पितिना हःगु खँ धाःगु दु । पशुपति क्षेत्र दुने कपाली जातिया ३३ गू परिवार च्वना वःगु खःसा उमित पशुपति विकास कोषं भचा भचा यानाः अनं विस्थापन याना छ्वयेधुंकूगु दु ।

थ्व स्वयां न्ह्यः पशुपति क्षेत्र हे अधिकरण याःबलय् आपालं कपालीत नं अनं विस्थापित जूगु खः । थुकिं यानाः ग्वल देशय् यायेमाःगु आपालं धार्मिक सांस्कृतिक परम्परा प्रभावित जूगु दु । ग्वलया कपालीत पशुपति लागाय् च्वंगु हनुमान देगः, नौग्रह द्यः, मनकामना महाद्यः आदि देगलय् द्यः पाःलाः च्वनीगु खः । पशुपति लागाय् उमिसं न्हिंन्हिं बाजं थायेगु व बँ पुइगु नं ज्या याना वयाच्वंगु खः ।

तर उमित अनं विस्थापित यायेवं थज्याःगु परम्परा लोप जुइगु अवस्थाय् थ्यंगु दु । पशुपति लागायात हिन्दूकरण याना यंकेगु झ्वलय् स्थानीय जनतायात पितिना छ्वःगुलिं उगु क्षेत्रय् हने माःगु आपालं जात्रा, पर्व व नखःचखः आः लोप जुइगु अवस्थाय् थ्यनाच्वंगु दु ।

स्थानीय जनतापाखें विरोध
पशुपति लागाय् च्वंगु देगलं स्थानीय कपाली पाःलाःयात पितिना हःगु खँयात कयाः स्थानीय जनता आक्रोशित जूगु दु । थुकियात कयाः आः थःपिंसं माःथाय् तक वनाः संघर्ष यायेगु खँ स्थानीय रमेश डंगोलं कनादिल । थ्व मुद्दायात कयाः स्थानीय जनतायात मुंकेगु व पशुपति विकास कोषय् वनाः खँ तः वनेगु ज्याया संयोजन डंगोलं हे यानाच्वनादीगु दु ।

थ्व खँयात कयाः आः स्थानीय जनता व थीथी नेवाः खलः पुचःतलिसे नं सहलह यानाः न्ह्याः वनेगु खँ वय्कलं कनादीगु दु । पशुपति विकास कोषया थ्व ज्या नेवाः परम्परा व नेवाः संस्कृति संस्कारया विरुद्ध जूगु खँ वय्कलं कनादिल ।