झिंखुसः देवा च्याकाः स्वांयाःपुन्हि हन

येँ(नेपालभाषा टाइम्स)- उदाय समाजं झिंखुसः देवा च्याकाः २५६७ क्वःगु स्वांयाः पुन्हि हंगु दु । मरुइ थुकथं स्वांयाः पुन्हि हंगु खः । मरुसतः न्ह्यःने च्वंगु दबुलिइ भगवान बुद्धया प्रतिमा तयाः समाजया नायः डा. रुपज्योति कसाः, तबः समाजया नायः सूर्यरत्न ताम्राकार, येँ मनपा २० वडाया अध्यक्ष राजेन्द्र मानन्धरं मंकाःकथं देवा च्याकाः ज्याझ्वःया उलेज्या यानादीगु खः । उगु इलय् समाजया पदाधिकारी, दुजःलिसें तबः समाजया जःपिंसं नं देवा च्याकादीगु खः ।

तबः समाजया व्यवस्थापनय् उगु ज्याझ्वः जूगु खः । उदाय समाजं थ्व स्वयां न्ह्यः नं स्वांयाः पुन्हिया लसताय् केलत्वाः, असं, न्यत, तेबहाः आदि थासय् देवाः च्याकेगु ज्याझ्वः यायेधुंकूगु दु । ज्याझ्वः लिपा तबः समाजपाखें खीर भोजन याकूगु खः । थ्वहे झ्वलय् २५६७ क्वःगु स्वांयाः पुन्हिया लसताय् थनया ध्वाखात्वालय् नं चीभाः पुजा यानाः देवा च्याकेगु ज्या जुल । ज्याझ्वलय् आपालं स्थानीयवासीपिं उपस्थित जूगु खः ।