‘बाहिरी चक्रपथं नेवाः विस्थापित याइ’

किपू – बाहिरी चक्रपथयात कयाः म्हिगः थनया श्रीकीत्ति विहारय् सहलह मुँज्या जुल । नागरिक संवाद केन्द्रया ग्वसालय् जूगु उगु ज्याझ्वलय् बाहिरी चक्रपथ व उकिं लाइगु लिच्वःया बारे सेभ नेपाल भ्यालीया कजि सुरज महर्जनं बिस्कं ज्यापौ न्ह्यब्वयादीगु खः । वय्कलं न्ह्यब्वःगु ज्यापती राज्यं न्यागः ध्यबा हे लगानी मयासे बाहिरी रिङरोडं आपालं जनता पीडित जुइमालीगु व थुकिं जनता स्वयां सरकारयात हे फाइदा जुइगु खँ कनादिल ।

अधिवक्ता दिपेन्द्र वज्राचार्यं सरकारं सर्वसाधारणया जग्गा सितिकं कायेत्यंगु खँ कँसें नेपाःया संविधान निसें ऐन कानूनय् तकं सितिकं जग्गा कायेगु प्रावधान मदुगुलिं अज्याःगु ज्या तत्काल दिकेमाः धयादिल । अथेहे नेपाल सांस्कृतिक पुनर्जागरण अभियानया नायः असोज महर्जनं ख्वनाया अवस्था बारे कँसें सरकारं यानाच्वंगु ज्या पूवंक हे ख्वनाया बासिन्दायात विस्थापित यायेगु कथं जुयाच्वंगु द्वपं बियादिल ।

सडक विस्तार विरुद्ध संघर्ष समितिया नायः सुमन साय्मिं सडक विस्तार व विकासया नामय् नेवाःतय्त हे विस्तापित यायेगु ज्या जुयाच्वंगु दु धयादिल । नागरिक संवाद केन्द्रया कजि रजनी मिलाया सभापतित्वय् न्ह्याःगु ज्याझ्वः श्रीकृष्ण महर्जनं सहजीकरण यानादीगु खः ।