पानीजहाजया डिपिआर तयार

येँ – भारतं नेपाः तक वइगु पानी जहाजया डीपीआर तयार याःगु दु । भारतया मिनिष्ट्री अफ सिपिङं नेपाःया नारायणी खुसि तक वइगु पानी जहाजया डीपीआर तयार याःगु खः । भारतं सीमा स्वयांं ४० किलोमिटर तापाक बाघातकया डीपीआर तयार याःगु खः । गंगा खुसिया बेसिनं कार्गो व पेसेन्जर ल्ह्यइगु जहाज नारायणी खुसि जुयाः नेपाः तक वइ ।

नेपालय् पानी जहाजया सम्भावना मालेत नीस्वंगु समितिया संयोजक माधव बेलबासें नेपाःया दासढुंगा तक पानी जहाज हयेफइगु प्रतिवेदन बिउगु खः । आः तयार जूगु डीपीआर कथं गंगा खुसि जुयाः नेपाःया पानी जहाज बंगलादेश तक सञ्चालन याये फइगु खँ धाःगु दु । दासढुंगां नेपाल भारत सिमा जुयाः बेथिया, धुमरिया घाट, कल्याणपुर, वैशाली जुयाः गंगा खुसिइ तक पानी जहाज चले जुइ ।

गंगा खुसिं कोलकत्ता व हल्दिया तक थ्यनी । पानी जहाज सञ्चालनय् वल धाःसा नेपाः आयात व निर्यातया ढुवानी लागत म्हो जुइगु खँ धाःगु दु । पानी जहाज सञ्चालन यायेगु बारे सहलह यायेत भारतीय पुचः थ्वहे मार्च ३ तारिख निसें ९ तारिक तक नेपालय् वयेत्यंगु दु । उगु पुचः नेपाः वयाः सहलह लिपा पानी जहाज सञ्चालनय् वयेफइगु खँ धाःगु दु ।

नेपालय् पानी जहाज सञ्चालन यायेत ३ मिटर जाः व ६० मिटर चौडाइ दुगु खुसिइ १५०० मेट्रिक टन भारवहन क्षमताया पानी जहाज सञ्चालन यायेफइगु रिपोर्ट नेपाःया अध्ययन पुचलं सरकारयात बिउगु खः । नेपालय् न्हापांखुसिइ ५०० टन क्षमताया जहाज हयेगु तयारी यानाच्वंगु दु । थ्वहे झ्वलय् नेपालय् पानी जहाज सञ्चालन यायेगु निंतिं थौं प्रधानमन्त्री केपी शर्मा ओलीं एकान्तकुनाय् पानीजहाज ज्याकूया उलेज्या यानादीगु ज्याझ्वः दु ।