काठमाडौं मलया नक्सा विवाद

येँ (नेपालभाषा टाइम्स)- येँ मनपा २२ वडाय् लाःगु धरहरां तप्यंक तिंख्यः पिचाइगु न्हूगु लँपुइ आः पीच यायेगु विषयय् हानं विवाद जूगुलिं लँ पीच यायेगु ज्या हे स्थगनय् लाः वंगु दु । लँ पीच मजुयाः न्हिंन्हिं धू ब्वःगुलिं स्थानीय जनता धाःसा पीडित जुइ मालाच्वंगुु दु ।

०७२ सालया भुखाचं दुंगु धरहरा हानं न्हू कथं दयेकेगु झ्वलय् अन गोश्वारा हुलाक, संचय कोष व काठमाडौं मलया जग्गा नं छुं भचा कयाः दुथ्याकेमाःगु खः । न्हूकथं धरहरा दयेकेगु झ्वलय् स्थानीय जनतायात अःपुइमा धकाः येँ मनपा २२ वडा व स्थानीय मनूतय् पहलय् धरहरां तप्यंक तिंख्यः न्ह्यःने पिचाइगु न्हूगु लँ छपु नं पिकाःगु खः । थ्व लँया कारणं उगु लँपु जुयाः वये–वने याइपिं मनूतय्त तसकं अःपुइगु लिसें स्थानीयवासीयात नं सुविधा जुइगु खँ धाःगु दु ।

लँ पिकायेधुंकाः आः पीच यायेत्यंगु इलय् धाःसा आकाझाकां काठमाडौं मलया नक्सा सम्बन्धी विवाद पिहां वया बिल । काठमाडौं मलं छगू तल्ला अण्डर ग्राउण्ड तयेगु व अन पार्किङ याके बीगु धकाः नक्सा पास यानातःगु खःसां निगू तल्ला अण्डर ग्राउण्ड यानाः छगू तल्लाय् पसः तयेके बियातःगु जुयाच्वन । नक्सा विपरित अण्डरग्राउण्ड दयेकल धकाः येँ मनपां मुद्दा ल्ह्वनेवं काठमाडौं मलं नं धरहरा दयेकेत थःपिंसं त्वःतागु जग्गा लित हजि धकाः माग याना हल । यदि सरकारं थःपिंत कारवाही यायेगु खःसा थःपिंसं नं सरकारयात जग्गा बी मखु धकाः काठमाडौं मल अडान कायेवं लँय् पीच यायेगु ज्या दिकेमाःगु अवस्था वल । काठमाडौं मलया जग्गा नं थ्वहे लँय् लानाच्वंगु दु । मलं अडान कयाः लँय् पीच तकं याके मबीगु ख्याच्वः बिया हल । थुकिं यानाः लँ पिकायेधुंकाः नं अन पीच याये मखनाच्वंगु दु ।

कामपा २२ वडाया वडा अध्यक्ष चिनिकाजी महर्जनं निगू निकायया विवादं यानाः जनता धू नयेत बाध्य जुयाच्वंगु खँ कनादिल । थ्व विवाद याकनं ज्यंकाः पिकायेधुंकूगु लँ सुचारु याके माःगु माग नं वय्कलं यानादीगु दु ।