अमेरिकीतय्सं प्रि–स्कूल गय् यानाः ल्यइ ?

थः मचायात प्रि–स्कूल ब्वनेकुथिइ भर्ना याये न्ह्यः खास यानाः अमेरिकी अभिभावकतय्सं छु छु खँय् ध्यान बी ? थ्व झीगु लागिं ज्या वयेफु ।

१) प्रि–स्कूलं ब्वंकीगु विषयवस्तु छु छु खः ? अन ब्वंकीगु शिक्षाया दर्शन छु खः ? उमिसं ब्वंकीगु खँ थःगु परिवार व समाजलिसे मिले जूगु विषय खः लाकि मखु ? अमेरिकी अभिभावकतय्सं थुकी विशेष ध्यान बी ।

२) प्रि–स्कूलय् आखः स्यनीपिं शिक्षकत गज्याःपिं खः ? उमिसं बाल विकास सम्बन्धी छुं नं विषयय् तालिम कयातःगु दुला ? मस्तय्त आखः ब्वंकीपिं शिक्षकत व अन ज्या याइपिं कर्मचारीत स्वास्थ्य सम्बन्धी जानकारी दुपिं खः लाकि मखु ? शिक्षक व कर्मचारीत मस्तय्त माया याइगु स्वभाव दुपिं खः लाकि मखु ?

३) मस्तय् समग्र मानसिक विकास यायेगु लागिं प्रि–स्कूलं गज्याःगु विधि नालेगु यानाच्वंगु दु ? मस्तय्गु मानसिक व बौद्धिक विकासया लागिं उमिसं छु छु ज्याखँ स्यनेगु यानाच्वंगु दु ?

४) प्रि–स्कूलय् मस्तय्त नियमित रूपं थ्यनेगु याः लाकि मयाः ? मस्त द्यनेगु याःसां न्हिं २ घन्टा ति हे जक द्यनेमाः । अप्वः द्यन धाःसा छेँय् चान्हय् न्ह्यः मवयेफु । मस्त थ्यनीबलय् उमित नाइसे च्वंगु लासा बीगु याः लाकि मयाः ?

५) मस्तय्त नकीगु नसा त्वँसा गथे च्वं ? साःगु जक मखु पौष्टिक तत्व नकेगु याः लाकि मयाः ? नइबलय् उपिं थःपिंसं हे नयेगु याइ लाकि कर्मचारीं नका बी ? नयेत च्वनीबलय् टेबुल गय् यानाः मिले याइ ?

६) मस्तय्त छेँय् हे आछि यायेगु स्यना हये माःगु खः कि व ज्या स्कूलय् हे स्यनी ? यदि छेँय् हे आछि याये सःम्ह मचा जूसां छुं जुयाः वं स्कूलय् हे आछि याना बिल धाःसा अज्याःगु इलय् स्कूलं छु व्यवस्था याइ ?

७) कक्षा क्वथा दुने मस्तय्त सकारात्मक व्यवहार स्यनेगु लागिं शिक्षकतय्सं छु विधि नालेगु यानाच्वंगु दु ?

८) छुं नं प्रि–स्कूलय् वने न्ह्यः उगु स्कूलया पृष्ठभूमि सीकेगु याइ । आवश्यक जुल धाःसा उकिया बारे नापं च्वंगु प्रहरीपाखें रिपोर्ट कायेगु याइ । स्कूलय् वनाः अभिभावकतय्सं थःपिंत यःगु व मयःगु खँ खुलस्त जुइक हे धतयेगु याइ ।