खाइप्वःचाय् पत्थर

झी स्वस्थ्य जुल धाःसा तिनि झीसं छुं नं ज्याखँयात च्वन्ह्याका यंकेफइ । उकिं थःगु स्वास्थययात बांलाकेया निंतिं नयेत्वनेगुली बांलाक बिचाः यायेमाः । उलि जक मखु, थःगु जीवनशैली ई कथं हिला वनेमाः व नापनापं व्यायाम यायेगु नं तसकं आवश्यक जू ।

थःगु शारिरीक अवस्था कथं गुलि गुलि व छु छु नयेमाः धइगु विषयय् सीका तयेमाःगु नं तसकं आवश्यक जू । झीगु शरीरय् जुइगु थीथी कथंया ल्वय् मध्ये पत्थरी ल्वय् नं छगू तःधंगु ल्वय् जुयाच्वंगु दु। पत्थर झीगु शरीरया निगू थासय् दयावइ । छगू खाइप्वःचाय् खःसा मेगु जलास्येँय् खः । गुम्हेसितं खाइप्वःचाय् पत्थर मुने यःसा गुम्हेसितं जलास्येँ (किडनी)य् पत्थर मुनि । खाइप्वःचाय् पत्थर जुइगु अप्वः धयाथें मिस्तय्त जुइसा मिजंतय्त अप्वः थें जलास्येँय् पत्थरी जुइ ।

पत्थर ल्वय् अप्वः थें नयेत्वनेगुली स्वापू दु। चिल्लो दुगु नसाज्वलं अप्वः नइपिंत, पुकातःगु, चिल्लोय् थुनातःगु नसा अप्वः नइपिंत, अप्वः ति मत्वनीपिंत, लः म्हो जक त्वनपिंत, इलय् मनइपिंत अप्वः थें पत्थरी जुइगु सम्भावना दु ।

खाइप्वःचाय् जुइगु पत्थरीयात पित्तया पत्थर नं धाः । पित्तः धयागु वाउँसे घाँय्रं गया छगू कथंया छ्वालुगु पदार्थ खः । गुगुकि खाइप्वःचां दयेकी । थ्व खाइपोचाय् बने जुइधुंकाः पित्तथैली जम्मा जुइ । थ्व पित्त झीसं नयागु नसा पचे यायेत तसकं आवश्यक खः । नयागु नसाज्वलं चिपुगु आन्द्राय् थ्यनेवं पित्तथैली कयेकुनेगु सुरु जुइ, अले पित्तरसं पित्तनलीया माध्यमं चिपुगु आन्द्राय् वनी,गुकिं नयागु दा, भिटामिन, खनिजतत्वयात पचे यायेगु ज्या जुइ । यदि पित्तथैलीं बांलाक ज्या मयात धाःसा चिल्लोप दार्थ पचे यायेफइमखु, अले पित्तथैली पत्थर मुंवनी । थथे पत्थर मुंवनकि पित्तथैलीं पिहां वइगु नलि बन्द जुयाः यक्व कष्ट जुइ । उलि जक मखु पित्तथैलीं पत्थर पिहां वयाः पित्तनलीइ लात धाःसा म्हासुल्वय् अर्थात जण्डीस जुइ यः । यदि ताःई तक खाइप्वःचाय् पत्थर थानाच्वन धाःसा क्यान्सर थेंज्याःगु ग्यानापुगु ल्वय् तकं जुइफु । उकिं पत्थर धकाः सिइवं चिकित्सकया सल्हा कथं अपरेसन यानाः वा तछ्यानाः लिकयाछ्वयेमाः ।

पत्थर ल्वय् जुइबलय् खनेदइगु लक्षण
प्वाःया च्वसं तसकं स्याइ, अले स्याइ तरिका मेकथं जुइ । गब्लें गब्लें ला दने हे मफयेक स्याइ, हानं लनावनी । अप्वः यानाः नसा नये धुनेवं प्वाःया च्वसं स्याइ । गुम्हं गुम्ह मनूतय्के छुं हे लक्षण खनेमदयेक हे पत्थर जुयाच्वने यः। चिल्लो, दाः भुनातःगुला, दा आदि नयेबलय् पचे मजुइगु थ्व नं छगू लक्षणखः । शरीरया छ्यंगू, मिखा म्हासु म्हासु धाया वइ । प्वाथय् ग्वारा थें दइगु आदि लक्षणत जुइ फु ।

गथे जुयाः पत्थर बने जुइ
चिल्लो यक्व नल धायेवं, अप्वः ल्ह्वन धायेवं शरिरय् यक्व चिल्ला दत धायेवं पचे यायेफइमखु, अथे पत्थर जुइ। थ्व खाइप्वःचाय् पत्थर अप्वः थें मिसापिंत जुइगु खनेदु। खास
यानाः झीगु देश नेपाल, भारतपाखे मचाबुइबलय् चाकुगु, चिले अप्वः नकेगु चलन दु। उकिं नं बाज्यः वनेधुंकूपिं मिस्तय्त अप्वः जूगु खनेदु । अथेहे यक्व मचाबुइकूपिं मिस्तय्के नं थ्व ल्वय् जूगु यक्व उदाहरण दु। सन्तुलित भोजन मनसें यल धायेवं यःयः थें यानाः नसानइपिं अप्वसित थ्व ल्वय् जूगु खनेदु ।

थ्व ल्वय् मजुइकेगु खःसा चिल्लो म्हो जक नयेगु, सफागु लः न्हिं ३-४ लिटर त्वनेगु प्वाः स्यात धाःसा तुरुन्त डाक्टर क्यनेगु यायेमाः । चिकित्सकया सल्हा कथं वासः यायेमाः । फयांफक्व मल्ह्वंकेगु , व्यायाम यायेगु यायेमाः । थःगु शरीरया बिचाःथम्हं तुं यायेमाः ।

सम्बन्धित बुखँ

LEAVE YOUR COMMENTS