नेवाः पत्रकार दबू नं संघीय संरचनाय्

येँ – नेवाः पत्रकार राष्ट्रिय दबूया खुक्वःगु दँमुँज्या थ्वहे वइगु ने.सं. ११३९ सिल्लाथ्व चतुर्थी शनिवाः (माघ २६ गते) याइगु जूगु दु । थुकी विधान संशोधन यायेगु ज्या नं जुइ । देय् संघीय संरचनाय् वनेधुंकूगु कारणं आः नेवाः पत्रकार राष्ट्रिय दबू नं संघीय संचनाय् वनेगु कथं विधान संशोधन जुइगु खँ धाःगु दु । उकिया नितिं मूछ्याञ्जे सुनिल महर्जनया नेतृत्वय् विधान मस्यौदा समिति दयेकाः ज्या यानाच्वंगु दु ।

संघीय संरचना कथं केन्द्र, प्रदेश, जिल्ला व स्थानीय तह यानाः प्यंगू तहया संरचना दयेकेगु खँ पत्रकार दबुलिं धाःगु दु । आवंलि नेवाः पत्रकार राष्ट्रिय दबूयात विदेशय् नं कचा दयेका यंकेगु कथंया संरचनाय् यंकाः विश्वन्यंकंया नेवाः पत्रकारतय्त छप्पँ छधी यायेगु अले छगू हे संगठनय् दुथ्याकेगु ग्वसाः दु । थुगुसीया साधारणसभाय् न्हापा थें हे थीथी नेवाः पत्रकारतय्त सिरपाः लःल्हायेगु नापं नेवाः पत्रकारतय्गु निंतिं अक्षय कोष घोषणा ज्याझ्वः नं दु ।

नेवाः पत्रकारतय्त आर्थिक समस्या जुइगु इलय् ग्वहालि यायेत थ्व अक्षय कोष दयेकेत्यंगु खः । थ्वहे झ्वलय् जलस्येँ ल्वचं पीडित जुयाच्वंम्ह पत्रकार दबूया दुजः आशाकाजी महर्जनयात हाकनं छगू लखं मल्याक आर्थिक ग्वहालि यायेगु ज्या व हे ज्याझ्वलय् जुइगु खँ धाःगु दु । नेवाः पत्रकार राष्ट्रिय दबूया इनापय् नेवार समाज हङकङया नायः रचना प्रधानया पहलय् हङकङय् च्वंपिं नेपाःमिपाखें वःगु १ लाख तका दां पत्रकार महर्जनयात लःल्हायेत्यंगु खः ।

पत्रकार दबूया ग्वसालय् पत्रकार महर्जनया सहयोग अभियान अन्तर्गत वंगु कछलागा आमै कुन्हु थीथी ब्यक्ति, संस्थातपाखें वःगु स्वतस्फूर्त रुपं ५९ हजार तका ग्वाहालि लःल्हाःगु खःसा मेमेपिंपाखें १७ हजार तकाया बचं वयाच्वंगु खःसा उगु ध्यबा नं आः माघ २६ गते लःल्हाइगु खँ धाःगु दु ।