धमाधम प्लाज्माया माग अप्वल

तःधंगु अस्पतालतय्सं अप्वः ध्यबा म्हयाच्वंगु द्वपं

येँ (नेपालभाषा टाइम्स) – राजधानी येँय् कारोना संक्रमित ल्वगितय् ल्याः अप्वयावं थें थुकिया उपचार यायेगु लागिं प्लाज्माया माग नं न्हियान्हिथं अप्वया वःगु दु। नेपालय् नं प्लाज्मा थेरापीपाखें कोरोनाया उपचार शुरु यायेवं थुकिया माग नं अप्वया वंगु खः ।

कोरोना ल्वचं संक्रमित जुयाः नं लनेधुंकूपिं मनूतय्गु हि कयाः न्हूम्ह विरामीया म्हय् थनेगु ज्या याइगु उपचारयात ‘प्लाज्मा थेरापी’ धाइ । कोरोनां कयाः नं लनेधुंकूम्ह मनूया हिइ एन्टी बडी प्रशस्त दइगु जुयाः वयागु हि तप्यंक विरामीयात बिल धाःसा उकिं कोरोना भाइरसयात पराजित यानाः याकनं ल्वय् लंकीगु खँ चिकित्सकतय्सं धाःगु दु। तर थ्व हि कोरोना संक्रमित जुयाः ल्वय् लंगुयां १२ निसें १८ न्हु दुने हे कायेमाः । वयां लिपा काःगु हि ज्या लगे जुइ मखु। लिसें हि बीम्ह मनू नं ६० किलो स्वयां अप्वः वजन दुम्ह मिजं जुइमाः । मिसापिं जूसा मचा मदुपिं जुइमाः धाःगु दु ।

नेपालय् कोरोना संक्रमित जूपिं विरामीया म्हसीका गोप्य याना तइगु जूगुलिं अज्याःपिं मनू मालेगु खःसा स्वास्थ्य मन्त्रालयय् वनाः नां व फोन नम्बर कायेमाः । यदि बीम्ह तयार जुल धाःसा वयागु हि कायेगु याइ । येँय् प्लाज्मा थेरापी शुरु जुया वःसां थ्व आः तक परीक्षणया हे चरणय् दुगु खँ स्वयंसेवी हिदाता संघया नायः प्रेमसागर कर्माचार्यं कनादिल । प्लाज्मा थेरापीपाखें ल्वय् लना हे वनी धकाः ग्यारेन्टी काये मफइगु खँ कँसें नेपालय् थुकिं गुलिसितं लनाच्वंगु व गुलिसितं मलंगु खँ वय्कलं कनादिल । स्वास्थ्य मन्त्रालयं प्लाज्मा थेरापीपाखें गुलि लना वन व गुलिं मलं धकाः तथ्यांक कयाच्वंगु जानकारी नं वय्कलं बियादिल ।

अथे हे नेपाल रेडक्रसलिसे आवद्ध समाजसेवी अमृतनारायण मानन्धरं थौंकन्हय् खास यानाः तःधंगु अस्पतालतय्सं विरामी वयेवं हे प्लाज्मा थेरापी शुरु यानाच्वंगु व उकिया लागिं उमिसं विरामीयाके अप्वः ध्यबा कायेगु यानाच्वंगु नं खने दत धाःसा उकी धाःसा सकलें सतर्क जुइमाःगु खँ कनादिल ।

अथे हे गुलिखे तःधंगु अस्पतालतय्सं रोग प्रतिरोधात्मक शक्ति बल्लाकीगु वासःयात हे कारोनाया वासः धकाः विरामीयात नकेगु व अप्वः ध्यबा असुल यानाच्वंगु खँ नं कनादिल । प्लाज्मा थेरापी याइबलय् प्लाज्माया ध्यबा म्वाःसां प्लाज्मा लिकाइगु मेशिन प्रयोग याःगु वापत पुलेमाःगु ध्यबा अप्वः काइगु जूगुलिं अज्याःगु शुल्क नं मिनाहा यायेमाःगु बिचाः मानन्धरं तयादिल ।

उखे कर्माचार्यं आः प्लाज्माया माग नं अप्वया वःगु जुयाः थुकियात नं स्टोर याना तयेमाःगु खँ कनादिल । स्वयंसेवी हिदातातय्सं पिने जिल्लाय् कोरोना संक्रमित जुयाः लंपिं मनूतय्गु हि संकलन याना तःगु दुसां यातायात चले मजूगुलिं येँय् हये मफयाच्वंगु खँ न वय्कलं कनादिल ।