ताःहाकःगु मुद्दा लिपा समय् फल्चा शिलान्यास

यल- ताः ईया विवाद लिपा पूच्वय् च्वंगु ‘समय् फल्चा’ या म्हिगः शिलान्यास जुल । म्हिगः यल महानगरपालिकाया मेयर चिरिबाबु महर्जनं उगु फल्चा शिलान्यास यानादीगु खः । विसं २०२९ सालय् दुनावंगु फल्चा २०५७ सालय् श्याम मलेगु व लक्ष्मी महर्जन सहित स्थानीय जनतां दयेकेत स्वःगु खःसां अन दुगु लालीगुराँस बहुउद्देश्यीय सहकारी संस्थां अदालतय् मुद्दा तयाः ज्या पना बिउगु खः । नीछदँया कानुनी ल्वापु लिपा फल्चा दयेकेगु नितिं म्हिगः शिलान्यास जूगु खः ।

बुंगद्यः लिसे स्वानाच्वंगु उगु फल्चा हाकनं दयेकेगु जुइवं लय्ताःपिं आपालं सम्पदाप्रेमी जनता म्हिगः शिलान्यास ज्याझ्वलय् सहभागी जूगु खः । यल मनपां वंगु भदौ ३ गते हे शिलान्यास यायेत्यंगु खःसां भदौ २ गते हे फल्चाया शिलान्यास पनेत जिल्ला अदालत, यलं ‘अन्तरकालीन आदेश’ बीवं स्थगित जूगु खः । तर वंगु भदौ २३ गते अदालतं अन्तरकालीन आदेश खारेज यानाः पुनर्निर्माणया लँपु चायेका बिउगु खः ।

समय् फल्चा पुनर्निर्माण समितिं २०५७ सालय् फल्चा दयेकेत्यंगु खः । उकी पुरातत्व विभागया सिफारिस व यलया सीडीओया नं सहमति दुगु खः । तर फल्चा नाप जग्गा स्वाःम्ह मेम्ह जग्गाधनीं पुनरावेदन अदालतय् मुद्दा दर्ता तयेवं ज्या दित । अनंलि २०६० साल भदौ १० गते अदालतं उगु मुद्दा खारेज याना बिल । म्हिगः शिलान्यास जूगु फल्चा आः स्वलाया दुने दयेके क्वचायेकीगु खँ धाःगु दु ।
उगु ऐतिहासिक फल्चाय् बुंगद्यःया रथ सालीबलय् न्हापा समय् नकेगु यानाच्वंगु खःसा आः पुनर्निर्माण लिपा हाकनं अन समय् नकेगु ज्या शुरु जुइगु खँ धाःगु दु ।