हनुमानध्वाखा संग्रहालय संचालनय्

येँ – हनुमानध्वाखा लाय्कुलिइ च्वंगु संग्रहालय संचालनय् वःगु दु । वंगु स्वदँ न्ह्यवंनिसें बन्द जुयाच्वंगु उगु संग्रहालय संचालनय् हःगु खः । २०७२ बैशाख १२ गतेया तःभुखाचं हनुमानध्वाखा–बसन्तपू लाय्कू लागाय् आपालं क्षति जूगु खःसा संग्रहालय पूर्णरुपं क्षति जूगु खः । विश्व सम्पदाया धलखय् लानाच्वंगु हनुमानध्वाखा लाय्कू लागाया संग्रहालय भुखाय् लिपा बन्द जुया वयाच्वंगु खः ।

भुखाचं संग्रहालय भवन क्षतिग्रस्त जुइवं ऐतिहासिक महत्वया हलंज्वलं तयातःगु संग्रहालय नं बन्द जूगु खः ।आः वयाः हनुमानध्वाखा लाय्कू लागा चाःहिउ वइपिं पर्यटकटय्त छुं छुं ऐतिहासिक सामग्री क्यनेगु ल्याखं दरवारया धुकुतिइ संग्रहालय संचालन याःगु खः । संग्रहालया पुलांगु भवन पूर्ण रुपं दयेकेत अझ छुं दँया ई काइगु जूगुलिं दरवारया धुकुतिइ अस्थायी रुपं स्वयेगु निंतिं व्यवस्था मिले यानागु पुरातत्व विभागया प्रवक्ता रामबहादुर कुँवरं कनादिल ।

अस्थायी रुपं व्यवस्था यानातःगु संग्रहालयय् दक्वं हलंज्वलं ब्वयेत सम्भव मजूगुलिं महत्वपूर्ण हलंज्वलं जक ब्वयेगु व्यवस्था यानातःगु दु । हनुमानध्वाखा संग्रहालय तत्कालीन जुजु त्रिभुवन, महेन्द्र व वीरेन्द्रया जीवनलिसें सम्बन्धित थीथी ऐतिहासिक हलंज्वलं संग्रह यानातःगु दु ।