स्वनिगः पिने धनुषाय् न्हापांखुसी नेवाः एकता दिवस

येँ – स्वनिगः पिने च्वंपिं नेवाःतय्सं न्हापांखुसी तःजिक नेवाः एकता दिवस न्यायेकूगु दु । धनुषाय् च्वंपिं नेवाः समुदायं गुक्वःगु नेवाः एकता दिवसया लसताय् उकथं छगू तःजिगु ज्याझ्वः यासें हंगु खः । गणेशमान चारनाथ नगरपालिका–५ चिसापानीया नेवाः समुदायं गुक्वःगु नेवाः एकता दिवसया लसताय् लाखे, थीथी झाँकीसहित मोटरसाइकल ¥याली नं पिथंगु खः ।

उगु ¥याली धनुषाया हे गोदार, विरेन्द्रबजाः भिमान जुयाः मलाबारीइ थ्यंकाः हाकनं व हे लँपु जुयाः चिसापानीइ थ्यंकाः क्वचायेकूगु खः ।
धनुषाया चिसापानीइ नेवाःतय्सं थुकथं न्हापांखुसी नेवाः एकता दिवस न्यायेकूगु इलय् उगु थासय् च्वंपिं आपालं नेवाःतय्सं उत्साहित जुयाः ब्वति काःगु खःसा आवंलि दँय्दसं थुकथं नेवाः एकता दिवस हनेगु प्रतिवद्धता नं प्वंकूगु दु ।

धनुषा जिल्लाया चिसापानी नेवाःतय् ख्वातुगु बाहुल्या दुगु क्षेत्र नं खः । स्थानीय राम श्रेष्ठया कथं थुकथंया दिवसया सन्दर्भय् लाकाः याइगु ज्याझ्वलं थवंथवय् भाइचारा अभिवृद्धि याइगु नापं थःगु समुदायया कला संस्कृतियात ल्यंकेत नं ग्वाहालि जुइ धयादिल । नेवाः देय् दबू धनुषाया नायः गोविन्दबहादुर शाहीया अगुवाइलय् जूगु दिवस धनुषाय् न्हापांखुसी न्यायेकूगु खः ।

नायः शाहीं नेवाः समुदायया कला, संस्कृति सकसिनं ययेकूगु धासें थुकिया संरक्षण यायेत नेवाःत हे जायेमाः धयादिल । उगु ज्याझ्वः कचिलाज कट्टेरो ममः एण्ड मोर अनामनगरया संचालक रित्तबहादुर श्रेष्ठया विशेष कुतलय् धनुषाया चिसापानीइ उकथं न्हापांखुसी नेवाः एकता दिवस हंगु खः ।